ជប៉ុន អនុម័តថវិការ៣០០ពាន់លានដុល្លារទៀត ជួយសេដ្ឋកិច្ចពីវិបត្តិកូវីដ១៩
ប្រទេសជប៉ុន៖ សភាជាន់ទាបដ៏មានឥទ្ធិពលរបស់ប្រទេសជប៉ុន កាលពីថ្ងៃពុធ ទី១០ មិថុនា ម្សិលមិញ បានអនុម័តកញ្ចប់ថវិការបន្ទាន់ ជិត៣០០ពាន់លានដុល្លារអាមេរិក ដើម្បីចាត់វិធានការស្រោចស្រង់សេដ្ឋកិច្ចប្រទេសមហាអំណាចសេដ្ឋកិច្ចលំដាប់ទី៣លើលោកមួយនេះ ក្រោយពេលជំងឺកូវីដ១៩បានធ្វើឲ្យសេដ្ឋកិច្ចជាតិដើរថយក្រោយ។
នេះគឺជាកញ្ចប់ថវិការអន្តរាគម លើបញ្ហាកូវីដ១៩ ជាលើកទី២ ក្នុងនោះ នឹងយកទៅចំណាយជួយដល់សហគ្រាសធនតូច និងផ្តល់ជាសាច់ប្រាក់ជូនបុគ្គលិកសុខាភិបាល។ កញ្ចប់នេះក៏នឹងយកទៅចំណាយជួយកម្មវិធីសង្គ្រោះហិរញ្ញវត្ថុ និងកម្ចីនានា របស់សហគ្រាសដែរ។
សេចក្តីព្រាងកញ្ចប់ថវិការ៣១.៩១ទ្រីលានយេន ឬ ២៩៧ពាន់លានដុល្លារអាមេរិកនេះនឹងត្រូវបញ្ជូនទៅឆ្លងបន្ត នៅសភាជាន់ខ្ពស់ នាថ្ងៃសុក្រ យ៉ាងយូរ។
សូមបញ្ជាក់ថា កញ្ចប់ថវិការលើកដំបូង ដែលជប៉ុនអនុម័តកាលពីថ្ងៃទី៣០ មេសានោះ រួមមានទាំងការជូនប្រាក់ប្រជាពលរដ្ឋទាំងអស់ និង កិច្ចការងារសុខាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។