ជិះម៉ូតូទៅអីវ៉ាន់ឲ្យម្តាយលក់ ត្រូវរថយន្តធំបុកស្លាប់ នៅខេត្តបន្ទាយមានជ័យ
ខេត្តបន្ទាយមានជ័យ ៖ យុវជនម្នាក់ ត្រូវរថយន្តធំ១គ្រឿងបុក បណ្តាលឲ្យស្លាប់យ៉ាងអាណោចអាធម័ ខណៈកំពុងជិះម៉ូតូទៅទិញអីវ៉ាន់ឲ្យម្តាយលក់។ ហេតុការណ៍នេះ បានកើតឡើងនៅវេលាម៉ោង៣និង៤៤នាទីទាបភ្លឺ ថ្ងៃទី១៥ ខែមិថុនា ឆ្នាំ២០២០ លើកំណាត់ផ្លូវជាតិលេខ៥៦A ក្នុងភូមិគោករការ ឃុំតាបែន ស្រុកស្វាយចេក ខេត្តបន្ទាយមានជ័យ។
នគរបាលមូលដ្ឋាន បានឲ្យដឹងថា ជនរងគ្រោះឈ្មោះ អឿន ឡាយហាំង ភេទប្រុស អាយុ ២២ឆ្នាំ រស់នៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។
មុនពេលកើតហេតុជនរងគ្រោះ បានក្រោកពីទាបភ្លឺ ជិះម៉ូតូទៅទិញ អីវ៉ាន់ឲ្យម្តាយលក់ ក្នុងទៅដៅពីជើងទៅត្បូង លុះមកដល់ចំណុចកើតហេតុ ក៏ត្រូវរថយន្តធុនធំ ធ្វើដំណើរច្រាសទិសគ្នា បុកយ៉ាងពេញទំហឹង បណ្តាលឲ្យស្លាប់ភ្លាមៗតែម្តង។ ភ្លាមៗអ្នកបកបររថយន្ត បានបើករត់គេចខ្លួនបាត់ស្រមោល។
ក្រោយពេលកើតហេតុ កម្លាំងជំនាញ បានចុះពិនិត្យរួចប្រគល់សពជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី។ រីឯម៉ូតូយកមករក្សាទុកនៅប៉ុស្តិ៍រដ្ឋបាលឃុំតាបែន រងចាំប្រគល់ជូនក្រុមគ្រួសារជនរងគ្រោះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។