៦ខែ ឆ្នាំនេះ! កម្ពុជា មានអ្នកជំងឺគ្រុនឈាមជាង ៣.០០០ករណី ស្លាប់៤ករណី
ភ្នំពេញ៖ ក្រសួងសុខាភិបាល បានប្រកាសថា ស្ថានភាពជំងឺគ្រុនឈាមនៅទូទាំងប្រទេស រយៈពេល៦ខែ (មករា ដល់មិថុនា) ឆ្នាំ២០២០នេះ បានថយចុះប្រមាណ៨៨% បើធៀបនឹងរយៈពេលដូចគ្នា កាលពីឆ្នាំទៅ។
ក្រសួងសុខាភិបាល បញ្ជាក់ថា ស្ថានភាពជំងឺគ្រុនឈាមនៅទូទាំងប្រទេស ក្នុងរយៈពេលពីខែមករា-មិថុនា ក្នុងឆ្នាំ២០២០ មានចំនួនសរុប ៣.៣៣៩ករណី និងស្លាប់ចំនួន ៤ករណី (អត្រាស្លាប់ ០,០៣%)។ ក្នុងអំឡុងប្រាំមួយខែដើមឆ្នាំ២០២០នេះ គឺករណីជំងឺគ្រុនឈាម បានថយចុះប្រមាណជា ៨៨% បើប្រៀបធៀបជាមួយឆ្នាំ ២០១៩ ក្នុងរយៈពេលដូចគ្នាដែលមាន ២៨.២៨៥ករណី និងស្លាប់ ៣២នាក់។
ករណីជំងឺគ្រុនឈាម បានថយចុះនៅទូទាំងប្រទេស នាដើមឆ្នាំ២០២០ តែករណីមានរាយប៉ាយដុំៗ តាមភូមិសាស្ត្រប្រជុំជនមួយចំនួន ពិសេសនៅរាជធានីភ្នំពេញ ខេត្តព្រះសីហនុ ប៉ៃលិន សៀមរាប កណ្ដាល កំពង់ធំ តាកែវ មណ្ឌលគិរី រតនគិរី និងខេត្តព្រះវិហារ។
ជាមួយគ្នា ក្រសួងសុខាភិបាល សូមអំពាវនាវ និងលើកទឹកចិត្ត ដល់ប្រជាជនគ្រប់រូបត្រូវបន្ត ចូលរួមអនុវត្តតាមវិធាន ការបង្ការជំងឺគ្រុនឈាមតាមយុទ្ធសាស្ត្រជាតិប្រយុទ្ធនឹងជំងឺគ្រុនឈាម ដែលក្រសួងសុខាភិបាល តែងបានផ្សព្វផ្សាយជាបន្តបន្ទាប់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។