របរចិញ្ចឹមកង្កែបរបស់កសិករ សោម លី នៅក្រុងសួង អាចរកចំណូលបាន ពី២០០០ទៅ៣០០០ដុល្លារ ក្នុង១ខែ
ខេត្តត្បូងឃ្មុំ៖ ព្រឹកនេះ ថ្ងៃទី២០ កក្កដានេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ឯកឧត្តម ចង់អញ្ជើញបងប្អូនកសិករ ចុះពិនិត្យមើលបទពិសោធន៍នៃការភ្ញាស់ និងចិញ្ចឹមកង្កែបរបស់កសិករ សោម លី នៅសង្កាត់វិហារលួង ក្រុងសួង។
ឯកឧត្តម បញ្ជាក់ទៀតថា កសិកររូបនេះ បានចាប់ផ្តើមរៀបចំអាងភ្ញាស់ និងចិញ្ចឹមកង្កែប ពីមានអាងចំនួន៦ សម្រាប់ដាក់មេពូជញី ២០ក្បាល ឈ្មោល ២០ក្បាល នៅពាក់កណ្តាលឆ្នាំ២០១៩ ហើយបានពង្រីកចំនួនអាងតង់ប្លាស្ទិចបាន ៥០អាង មានមេពូជ ៣៥០ក្បាល និងឈ្មោល ៣៥០ក្បាល។ មកទល់បច្ចុប្បន្ននេះ អាចមានលទ្ធភាពលក់កូនកង្កែបបានចំនួន ៥០ ០០០ក្បាល។
ទន្ទឹមនឹងនេះ កសិកររូបនេះ បានភ្ញាស់កូនកង្កែប (កូនក្អុក) បានចំនួន ១០០ ០០០ក្បាល ដែលទៀបតែញាស់បានមួយថ្ងៃ នៅក្នុងអាងចំនួន ៩អាង។ បច្ចុប្បន្នកូនកង្កែប និងកង្កែបសាច់ កំពុងមានទីផ្សារល្អណាស់ ដោយកូនកង្កែបមួយអាចលក់បានតម្លៃ ៤០០រៀល ទៅឲ្យកសិករចិញ្ចឹមបន្តក្នុងខេត្តត្បូងឃ្មុំ កំពង់ចាម ក្រចេះ ស្ទឹងត្រែង ពោធ៍សាត់ និងខេត្តព្រៃវែង។
ចំណែកកង្កែបសាច់ លក់ទៅកាន់ទីផ្សារតម្លៃជាមធ្យម ១០ ០០០រៀល/គ.ក្រ អាចទទួលបានចំណេញបានចន្លោះពី ២ ០០០-៣ ០០០ដុល្លា/ខែ ហើយក្នុងរយៈពេល ៣-៤ខែខាងមុខនេះ គាត់មានផែនការពង្រីកបន្ថែមលើផ្ទៃដីចំនួន ២ហិកតាបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។