បញ្ជូនខ្លួនជនជាតិកូរ៉េ ២នាក់ទៅតុលាការ ពាក់ព័ន្ធករណីគ្រឿងញៀនជាង ១គីឡូក្រាម
ភ្នំពេញ៖ យ៉ាងហោចណាស់ជនជាតិកូរ៉េចំនួន ២នាក់ ត្រូវបានកម្លាំងជំនាញ នៃមន្ទីរប្រឆាំងបទល្មើសគ្រឿងញៀន(ក១) បញ្ជូនខ្លួនទៅកាន់ សាលាដំបូង កាលពីថ្ងៃទី២៦ ខែកក្កដា ឆ្នាំ២០២០ ករណីជួញដូរគ្រឿងញៀនជាង ១គីឡូក្រាម ដែលឆ្លងដែនពីកម្ពុជា ទៅប្រទេសកូរ៉។
លោកឧត្តមសេនីយ៍ទោ អ៊ិន សុង នាយករងមន្ទីរប្រឆាំងគ្រឿងញៀន បានឲ្យដឹងថា ជនសង្ស័យទាំង២នាក់ ត្រូវបានឃាត់ខ្លួន នៅចំណុចមុខអាផាតមិនវីសឌឹម (WISDOM APARTMENT) អគារលេខ១៦ ផ្លូវលេខ៤៤៦ សង្កាត់ទួលទំពូង១ ខណ្ឌចំការមន រាជធានីភ្នំពេញ និងរឹបអូសគ្រឿងញៀនជាង ១គីឡូក្រាម កាលពីថ្ងៃទី២៣ ខែកក្កដា ឆ្នាំ២០២០ កន្លងទៅ ដែលបម្រុងឆ្លងដែនពីកម្ពុជា ទៅកូរ៉េ។
ជនសង្ស័យទាំង ២នាក់នេះ មានឈ្មោះ SONG MIN SOO ភេទប្រុស កើតឆ្នាំ១៩៦១ ជនជាតិកូរ៉េ កាន់លិខិតឆ្លងដែនលេខ M717071112 “មានដីកាស្វែងរកចាប់ខ្លួនរបស់នគរបាលអន្តរជាតិ(និវេទន៍ក្រហម)” និងឈ្មោះ CHOI MIN YOUNG ភេទប្រុស កើតឆ្នាំ១៩៧០ ជនជាតិកូរ៉េ។
ចំណែកវត្ថុតាងដកហូត បានប្រភេទមេតំហ្វេតាមីន(ICE) ទម្ងន់ជាង ១,៣៨៩.៥៣g, រថយន្ត ១គ្រឿង, ទូរស័ព្ទ ៣គ្រឿង, ជញ្ជីងថ្លឹង ២គ្រឿង និងសម្ភារៈសម្រាប់វេចខ្ចប់ និងលាក់បង្កប់គ្រឿងញៀនមួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។