១ថ្ងៃម្សិលមិញ! សមត្ថកិច្ចបង្ក្រាបបទល្មើសយានយន្ត ៧២០គ្រឿង
ភ្នំពេញ៖ កាលពីថ្ងៃទី០២ ខែសីហា ឆ្នាំ២០២០ នគរបាលចរាចរណ៍ទូទាំងប្រទេសកម្ពុជា បានត្រួតពិនិត្យនិងផាកពិន័យលើយានយន្តសរុបចំនួន ៧២០គ្រឿងទៀត ក្នុងនោះមានម៉ូតូ ៥១៤គ្រឿង និងរថយន្ត ២០៦គ្រឿង។
បើតាមការបញ្ជាក់របស់ឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យ នៃអគ្គស្នងការដ្ឋាននគរបាលជាតិ បញ្ជាក់ថា រយៈពេល៩៤ថ្ងៃ នៃការរឹតបន្ដឹងច្បាប់ចរាចរណ៍ផ្លូវគោក ដោយបង្កើនប្រាក់ពិន័យ តាមអនុក្រឹត្យលេខ៣៩ ពោលគឺថ្ងៃទី០១ ខែឧសភា ដល់ថ្ងៃទី០២ ខែសីហា ឆ្នាំ២០២០ នគរបាលចរាចរណ៍ទូទាំងប្រទេស បានត្រួតពិនិត្យ និងផាកពិន័យយានយន្តសរុបចំនួន ១២៦៨៣៣គ្រឿង ក្នុងនោះមានម៉ូតូ ៩៣៩៦៨គ្រឿង និងរថយន្តគ្រប់ប្រភេទ ៣២៨៦៥គ្រឿង។
បទល្មើសដែលត្រូវបានកត់សម្គាល់សម្រាប់ម៉ូតូ គឺភាគច្រើនអត់មួក ល្មើសសញ្ញា អត់ស្លាកលេខ និងប្រើប្រាស់ទូរស័ព្ទដៃ។ ដោយឡែកបទល្មើសសម្រាប់រថយន្ត គឺភាគច្រើនលើសល្បឿន លើសចំណុះ អត់ខ្សែក្រវាត់ ល្មើសសញ្ញា អត់ស្លាកលេខ ដឹកលើសទម្ងន់ ប្រើប្រាស់ទូរស័ព្ទជាដើម។
សូមបញ្ជាក់ថា សម្រាប់ថ្ងៃទី០២ ខែសីហា ឆ្នាំ២០២០នេះ គ្រោះថ្នាក់ចរាចរណ៍នៅទូទាំងប្រទេសកម្ពុជា ក៏បានកើតឡើងចំនួន ៤លើក ក្នុងនោះស្លាប់ ១នាក់ របួស៥នាក់ (របួសធ្ងន់ ៥នាក់)។ រយៈពេល ៩៤ថ្ងៃនេះ គ្រោះថ្នាក់ចរាចរណ៍សរុប ចំនួន ៧២៣លើក ក្នុងនោះស្លាប់ ៣៩២នាក់ របួស ១១២៤នាក់ (របួសធ្ងន់ ៦៦០នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។