កម្ពុជា នឹងបញ្ចប់ការគម្រាមកំហែងដោយសារមីន ឲ្យអស់ត្រឹមឆ្នាំ២០២៥
ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន មានប្រសាសន៍ថា រាជរដ្ឋាភិបាលកម្ពុជា បានដាក់ចេញចក្ខុវិស័យ និងផែនការយុទ្ធសាស្ត្រច្បាស់លាស់ ក្នុងការបញ្ចប់ការគម្រាមកំហែងដោយសារមីន ឲ្យអស់ត្រឹមឆ្នាំ២០២៥។ ឯកឧត្តម បានថ្លែងបែបនេះ ក្នុងពិធីវគ្គបណ្តុះបណ្តាល ស្តីពីការប្រើប្រាស់ប្រព័ន្ធគ្រប់គ្រងផែនការបោសសម្អាតមីន គ្រាប់បែកចង្កោម និងកម្មវិធីវិភាគទិន្នន័យសកម្មភាពមីន នៅខេត្តសៀមរាប កាលពីថ្ងៃទី១៣ ខែសីហា ឆ្នាំ២០២០ ដែលវគ្គបណ្តុះបណ្តាលនេះ មានរយៈពេល៣ថ្ងៃ ។
ឯកឧត្តមទេសរដ្ឋមន្ត្រី លី ធុជ មានប្រសាសន៍ទៀតថា តាមរយៈនៃការប្រើប្រាស់ប្រព័ន្ធថ្មីនេះ នឹងផ្តល់ភាពងាយស្រួលក្នុងការតាមដានការអនុវត្តផែនការបោសសម្អាតមីន របស់ម៉ាពូ រាជធានី-ខេត្ត តាមរយៈអនឡាញ ហើយក៏អាចអនុញ្ញាតឲ្យម៉ាពូ ផ្ទុកនិងឆែកមើលទិន្នន័យ ក្នុងខេត្តរបស់ខ្លួនបានយ៉ាងងាយស្រួលផងដែរ។
លោក ពិន ប្រាកដ អភិបាលរងខេត្ត និងជាប្រធានគណកម្មាធិការសកម្មភាពមីនខេត្តសៀមរាប បានបញ្ជាក់ថា តាមតួរលេខរបស់អង្គការ ស៊ីអិមវីស ( CMVIS ) ក្នុងក្របខ័ណ្ឌទូទាំងប្រទេស បានបង្ហាញថា ក្នុងឆមាសទី១ ឆ្នាំ២០២០ ចំនួនជនរងគ្រោះដោយសារមីន និងគ្រាប់យុទ្ធភ័ណ្ឌមិនទាន់ផ្ទុះមានចំនួន៣៨នាក់ ថយចុះ៤០ភាគរយ បើធៀបទៅនឹងរយៈពេលដូចគ្នាក្នុងឆ្នាំ២០១៩កន្លងទៅ ដែលមានអត្រាជនរងគ្រោះចំនួន៤៨នាក់ ដែលនេះគឺជាបញ្ហាដែលតម្រូវឲ្យអ្នកពាក់ព័ន្ធ ចូលរួមក្នុងកិច្ចសហប្រតិបត្តិការការងារអប់រំផ្សព្វផ្សាយឲ្យបានទូលំទូលាយបន្ថែមទៀត ខណៈដែលម៉ាពូ គឺជាខ្នងបង្អែកនៅក្នុងវិស័យមីន និងជាអ្នកជួយកាត់បន្ថយ ពិការភាព និងការបាត់បង់ជីវិត ក្រោមការគម្រោមកំហែងដោយគ្រាប់មីនប្រឆាំងមនុស្ស កាកសំណល់នៃសង្ក្រាមនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។