បាតុភូត La Nina និងEnso នឹងធ្វើឲ្យកម្ពុជា រងនូវជំនន់ទឹកភ្លៀង
ភ្នំពេញ៖ កម្ពុជា នឹងទទួលរងនូវជំនន់ទឹកភ្លៀងញឹកញាប់ ចាប់ពីខែក្រោយ រហូតដល់ចុងខែតុលា ឆ្នាំ២០២០ ដែលសភាពការណ៍នេះប្រហាក់ប្រហែលនឹងស្ថានភាពអាកាសធាតុនៅប្រទេសកម្ពុជាអំឡុងឆ្នាំ ១៩៨១ និងឆ្នាំ ២០១០។ នេះបើតាមការឱ្យដឹងរបស់មន្ត្រីជាន់ខ្ពស់នៃក្រសួងធនធានទឹក និងឧតុនិយម។
ឯកឧត្តម ចាន់ យុត្ថា អ្នកនាំពាក្យនៃក្រសួងធនធានទឹក និងឧតុនិយមបានលើកឡើងថា តាមការសង្កេតរបស់ស្ថានីយឧតុនិយមធំៗនៅអាស៊ី អឺរ៉ុប អាមេរិកបានបង្ហាញថា ចាប់ពីខែកញ្ញា ឆ្នាំ ២០២០ នេះតទៅ ប្រទេសកម្ពុជាក៏ដូចជាបណ្ដាប្រទេសក្នុងតំបន់មួយចំនួននឹងទទួលរងឥទ្ធិពលពីបាតុភូត La Nina ៦០ ភាគរយ និង ៤០ ភាគរយទៀតជាបាតុភូត Enso។
ឯកឧត្តម ចាន់ យុត្ថា បានមានប្រសាសន៍ថា៖ «ចាប់ពីពាក់កណ្តាលខែកញ្ញាទៅ ពេលដែលបាតុភូត La Nina គ្របដណ្តប់ ៦០ ភាគរយ មកលើប្រទេសកម្ពុជា យើងនឹងទទួលល្បាយទឹកភ្លៀងច្រើនដែលអាចបណ្តាលឱ្យមានជំនន់ទឹកភ្លៀង ហើយឥទ្ធិពល ៦០ ភាគរយ មិនមែនធ្លាក់មកលើប្រទេសយើងតែ ១ ទេ គឺទៅលើប្រទេសក្នុងតំបន់របស់យើងក៏ទទួលរងឥទ្ធិពលនេះដែរ»។
ឯកឧត្តម ចាន់ យុត្ថា បានលើកឡើងថា ក្រសួងតែងតែរៀបចំក្រុមការងារតាមដានស្ថានភាពគ្រប់ទីកន្លែងក្នុងខេត្ត-ក្រុងទូទាំងប្រទេសកម្ពុជា និងការត្រៀមអន្តរាគមន៍នូវគ្រឿងចក្រក្នុងករណីដែលទឹកជំនន់មានការប៉ះពាល់ទីប្រជុំជន ឬភូមិឋានរបស់ប្រជាពលរដ្ឋគឺក្រសួងមានវិធានការកាយបង្វែរទឹកចេញដើម្បីបញ្ចៀសការប៉ះពាល់ដល់ប្រជាពលរដ្ឋ។ ឯកឧត្តមក៏បានអំពាវនាវទៅដល់ប្រជាពលរដ្ឋដែលមានទីលំនៅ ឬធ្វើរបរកសិកម្មនៅតាមទំនាបអមសងខាងផ្លូវទឹកត្រូវបង្កើនការយកចិត្តទុកដាក់ និងប្រុងប្រយ័ត្នខ្ពស់ចាប់ពីពាក់កណ្តាលខែកញ្ញារហូតដល់ចុងខែតុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។