ផ្ទុះកង់រថយន្តក្រឡាប់ធ្លាក់ប្រឡាយ ស្លាប់អ្នកបើកបរម្នាក់ ៧នាក់ទៀតរបួសធ្ងន់ស្រាល
ខេត្តកំពង់ឆ្នាំង៖ អ្នកបើកបររថយន្តម្នាក់ បានស្លាប់ភ្លាមៗ និងមនុស្ស៧នាក់ទៀត បានរងរបួសធ្ងន់ស្រាល ករណីផ្ទុះកង់រថយន្តក្រឡាប់ធ្លាក់ប្រឡាយ កាលពីរសៀល ថ្ងៃទី២ ខែកញ្ញា ឆ្នាំ២០២០ម្សិលមិញ នៅចំណុចស្ពានត្រាំរទេះ ក្នុងភូមិរមាស ឃុំតាំងក្រសាំង ស្រុកទឹកផុស ខេត្តកំពង់ឆ្នាំង។
តាមរបាយការណ៍ពីសមត្ថកិច្ច បានឲ្យដឹងថា រថយន្តបង្កខាងលើ ម៉ាកHILUX VIGO ពណ៌ទឹកប្រាក់ ពាក់ស្លាកលេខ រដ្ឋ66.2-0589 បានដំណើរតាមបណ្តោយផ្លូវខាងលើ លុះមកដល់ចំណុចកើតហេតុ ស្រាប់តែផ្ទុះកង់ខាងស្តាំទាំងសងខាង ក្រឡាប់ធ្លាក់ចូលប្រឡាយទឹក បណ្តាលឲ្យអ្នកបើកបរឈ្មោះ ឡោ ដាលីស ភេទស្រី អាយុ៣០ឆ្នាំ រស់នៅខណ្ឌដង្កោ ក្រុងភ្នំពេញ ស្លាប់នៅនឹងកន្លែងតែម្តង រីឯអ្នករួមដំណើរចំនួន៧នាក់ របួសធ្ងន់ស្រាល។
ក្រោយពេលកើតហេតុ សមត្ថកិច្ចបានបញ្ជូនសាកសពយកមករក្សាទុកនៅមន្ទីរពេទ្យស្រុកទឹកផុស រង់ចាំបងប្អូនមកទទួលយកទៅធ្វើបុណ្យតាមប្រពៃណី រីឯអ្នករបួសធ្ងន់បានបញ្ជូនទៅកាន់មន្ទីរពេទ្យខេត្តកំពង់ឆ្នាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។