សហគមន៍ទេសចរណ៍បាគងភូមិខ្ញុំ ចូលរួមចំណែកអភិវឌ្ឍសេដ្ឋកិច្ចមូលដ្ឋាន
ខេត្តសៀមរាប៖ ក្នុងពិធីចែកអំណោយជូនដល់លោកយាយ លោកតា និងបងប្អូនប្រជាពលរដ្ឋចំនួន ១៥០គ្រួសារ នៅសហគមន៍បាគងភូមិខ្ញុំ ស្ថិតក្នុងភូមិថ្នល់ត្រង់ ឃុំបាគង ស្រុកប្រាសាទបាគង ខេត្តសៀមរាប កាលពីពេលថ្មីៗនេះ លោក សូត្រ សួរ តំណាងសហគមន៍បាគងភូមិខ្ញុំ បានឲ្យដឹងថា សហគមន៍ទេសចរណ៍បាគងភូមិខ្ញុំនេះ គឺរៀបចំឡើងដោយឈរលើទស្សនៈវិស័យ និងបេសកកម្មរបស់សហគមន៍ ដើម្បីចូលរួមចំណែកក្នុងការអភិវឌ្ឍសេដ្ឋកិច្ចមូលដ្ឋានឱ្យកាន់តែប្រសើរឡើង។
លោក សូត្រ សួរ បានឲ្យដឹងទៀតថា ទៅថ្ងៃអនាគតដ៏ឆាប់ៗនេះ សហគមន៍គ្រោងនឹងសហការជាមួយបងប្អូនប្រជាពលរដ្ឋ ដែលមានខ្នងផ្ទះស្រាប់នៅជុំវិញសហគមន៍ ឲ្យធ្វើការកែលម្អបន្ទប់គេង , បំពាក់ភ្លើងអំពូល គ្រែ ពូក ខ្នើយ បន្ទប់ទឹក ដើម្បីបម្រើសេវាកម្មផ្ទះស្នាក់សម្រាប់ភ្ញៀវទេសចរណ៍ រួមជាមួយនឹងកម្មវិធីផ្សេងៗទៀត ដូចជា៖ ការជិះរទះគោ , ស្ទូចត្រី , ឆ្លុះត្រី , ដាក់បង្កៃត្រី , ដាក់មោង និងដាក់ទ្រូជាដើម ដើម្បីបង្កើនចំណូលសម្រាប់ប្រជាពលរដ្ឋ , ការថែទាំសួនឈើប្រឌិតឲ្យបានគង់វង្ស , ការខិតខំរក្សាទំនៀមទម្លាប់ប្រពៃណីខ្មែរ និង ការធ្វើឲ្យភូមិបាគងជាភូមិមួយមានបរិស្ថានស្អាត មានសោភ័ណភាព ដើម្បីទាក់ទាញភ្ញៀវទេសចរជាតិអន្តរជាតិឱ្យមកកម្សាន្ត។
ក្នុងឱកាសនោះដែរ លោក ពៅ ពិសិដ្ឋ អភិបាលរងខេត្តសៀមរាប បានសម្ដែងនូវការគាំទ្រចំពោះការបង្កើតសហគមន៍ទេសចរណ៍ បាគងភូមិខ្ញុំនេះ ព្រោះវាពិតជាមានសារៈសំខាន់ដើម្បីរួមចំណែកទាក់ទាញអ្នកទេសចរណ៍ក្នុងស្រុក ឱ្យមកទស្សនាខេត្តសៀមរាប និងជាការបង្កើតការងារជូនដល់ប្រជាពលរដ្ឋក្នុងមូលដ្ឋានដើម្បីពួកគាត់មានឱកាសរកប្រាក់ចំណូលសម្រាប់ទ្រទ្រង់ជីវភាពគ្រួសារ ខណៈដែលជំងឺឆ្លងកូវីដ១៩ មិនដឹងពេលណានឹងផុតរលត់នោះឡើយ ស្របតាមគោលការណ៍របស់រដ្ឋបាលខេត្ត ដែលបាននឹងកំពុងជំរុញដល់រដ្ឋបាលក្រុងស្រុក ឲ្យយកចិត្តទុកដាក់លើការបង្កើតឱ្យមានតំបន់ទេសភាពធម្មជាតិ អេកូទេសចរណ៍ និងសហគមន៍ទេសចរណ៍ នៅតាមមូលដ្ឋានរបស់ខ្លួន ខណៈវិបត្តិជំងឺឆ្លងកូវីដ១៩ បានធ្វើឱ្យមានផលប៉ះពាល់យ៉ាងធ្ងន់ធ្ងរ ដល់សេដ្ឋកិច្ចសកល ក៏ដូចជាសេដ្ឋកិច្ចជាតិ ពិសេសប្រតិបត្តិករ និងអ្នកបម្រើការងារក្នុងវិស័យទេសចរណ៍ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។