ឯកឧត្តមបណ្ឌិត គុណ ញឹម អនុញ្ញាតឲ្យមន្ត្រីជាន់ខ្ពស់អូស្ត្រាលី ចូលជួបសម្តែងការគួរសម
ភ្នំពេញ៖ កាលពីថ្ងៃទី៣០ ខែកញ្ញា ឆ្នាំ២០២០ នៅបន្ទប់ប្រជុំអគ្គនាយកដ្ឋានគយនិងរដ្ឋាករកម្ពុជាជាន់ទី១៨ ឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានគយនិងរដ្ឋាករកម្ពុជា(អគរ) បានអនុញ្ញាតឱ្យលោក Anthony Maguire មន្ត្រីជាន់ខ្ពស់នៃសហព័ន្ធនគរបាលអូស្ត្រាលី (Australian Federal Police-AFP) នៃស្ថានទូតអូស្ត្រាលីប្រចាំនៅព្រះរាជាណាចក្រកម្ពុជា (Australian Embassy) ចូលជួបសម្តែងការគួរសម និងពិភាក្សាអំពីកិច្ចសហប្រតិបត្តិការរវាងអគរ និងសហព័ន្ធនគរបាលអូស្ត្រាលី។
ក្នុងជំនួបនេះ លោក Anthony Maguire បានកោតសរសើរអគរ ក្នុងការខិតខំប្រឹងប្រែងរួមគ្នាដើម្បីប្រយុទ្ធប្រឆាំងនឹងការគំរាមកំហែងដែលបង្កឡើងដោយឧក្រិដ្ឋកម្មឆ្លងដែន។ ទន្ទឹមនេះ ឯកឧត្តមប្រតិភូបានលើកឡើងថាជំនួបពិភាក្សានេះ ជាជំនួបលើកដំបូង និងបានស្វាគមន៍នូវគំនិតផ្តួចផ្តើមរបស់លោក Anthony Maguire លើកិច្ចសហការផ្នែកបង្ការ និងបង្ក្រាបបទល្មើស រវាងអគរ និង AFP ជាពិសេសលើការបង្ក្រាបបទល្មើសជួញដូរគ្រឿងញៀន ទំនិញនិងឱសថក្លែងក្លាយ សត្វព្រៃ ទំនិញខុសច្បាប់ ការប្រឆាំងការសម្អាតប្រាក់ និងហិរញ្ញប្បទានភេរវកម្មជាដើម។
បន្ថែមលើនេះ ឯកឧត្តមប្រតិភូបានចាត់មន្ត្រីនៃនាយកដ្ឋានសហប្រតិបត្តិការគយអន្តរជាតិជាមន្ត្រីទំនាក់ទំនងជាមួយ AFP និងបានសន្យានឹងបន្តពង្រឹង និងពង្រីកកិច្ចសហប្រតិបត្តិការរវាងអគរ និងសហព័ន្ធនគរបាលអូស្ត្រាលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។