ពិភពលោកមានករណីឆ្លងកូវីដ១៩ កើនឡើងជាង៣៥,៣លាននាក់ហើយ
នៅទូទាំងពិភពលោក មានមនុស្សជាង១លាននាក់ហើយបានស្លាប់ដោយការឆ្លងកូវីដ១៩ និងពលរដ្ឋជាង៣៥,៣លាននាក់បានឆ្លងកូវីដ១៩ នៅ លើ២១៤ប្រទេស និងដែនដី។ ជាមួយគ្នានោះក៏មានអ្នកជាសះស្បើយពី ជំងឺ កូវីដ១៩ដល់ទៅ ជាង២៦,៥លាននាក់ផងដែរ។
ប្រទេសដែលមានអ្នកឆ្លងច្រើនជាគេ គឺអាមេរិក មានដល់ទៅជាង៧,៦លានានក់ និងស្លាប់ជាង២សែននាក់ ព្យាបាលជាសះស្បើយ ជាង៤,៨លាននាក់។ លំដាប់ទីពីរគឺឥណ្ឌា មានអ្នកឆ្លង កើនឡើងដល់ជាង ៦,៦លាននាក់ ស្លាប់ជាង១សែននាក់ និងជាសះស្បើយជាង ជាង៥,៥លានានក់។
កាលពីនៅថ្ងៃអាទិត្យ ទី០៤ ខែតុលា ក្រសួងសុខាភិបាលឥណ្ឌា បានប្រកាសថា ចំនួនអ្នកឆ្លង COVID-19 នៅទូទាំងប្រទេសបានកើនលើស ៦.៦លាននាក់ហើយ បន្ទាប់ពីករណីឆ្លងថ្មីចំនួន ៧៥,៨២៩នាក់ ត្រូវបានគេរាយការណ៍ក្នុងរយៈពេល២៤ម៉ោងចុងក្រោយនេះ។ ក្នុងរយៈពេល២៤ម៉ោងចុងក្រោយដូចគ្នា អ្នកជំងឺ COVID-19 ៩៤០នាក់ ក៏បានស្លាប់ផងដែរ ដោយនាំឱ្យអ្នកស្លាប់សរុបកើនដល់ ១០១,៧៨២នាក់។
ដោយឡែកនៅក្នុងតំបន់អាស៊ាន ហ្វីលីពីនមានករណី មានករណីឆ្លងច្រើនជាងគេ ក្នុងរយពេល ១ថ្ងៃរកឃើញអ្នកឆ្លងថ្មីៗ ៣,១៩០ករណី និងស្លាប់ជាង ១០០នាក់។ អាជ្ញាធរសុខាភិបាលរបស់ប្រទេសហ្វីលីពីន នៅថ្ងៃអាទិត្យនេះ បានរាយការណ៍ពីការរកឃើញករណីឆ្លង COVID-19 ថ្មីៗបន្ថែម ចំនួន ៣,១៩០ករណី ដែលជាអត្រាឆ្លងប្រចាំថ្ងៃខ្ពស់បំផុត រាប់ចាប់តាំងពីថ្ងៃទី២១ ខែកញ្ញាមក។
បើតាមការបញ្ជាក់របស់ក្រសួង ក្នុងរយៈពេលដូចគ្នានេះ ក្រៅពីករណីឆ្លង ហ្វីលីពីនក៏បានកត់ត្រាករណីស្លាប់ថ្មីៗជាង ១០០នាក់ បន្ថែមទៀតផងដែរ ដែលជាអត្រាស្លាប់ប្រចាំថ្ងៃខ្ពស់បំផុត ចាប់តាំងពីថ្ងៃទី ១៤ កញ្ញាមក។ បច្ចុប្បន្ន ហ្វីលីពីនដែលកំពុងឈរនៅលើកំពូលតារាង នៃប្រទេសដែលមានអ្នកឆ្លង និងស្លាប់ច្រើនជាងគេបំផុតប្រចាំតំបន់ បានកត់ត្រាករណីឆ្លង COVID-19 សរុបចំនួន ៣២២,៤៩៧នាក់ ក្នុងនោះ ៥,៧៧៦នាក់ស្លាប់ និង ២៧៣,០៧៩នាក់បានជាសះស្បើយឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។