អ្នកជំនាញ ព្រមានថា ស្ថានភាពកូវីដ១៩ លោកដូណាល់ ត្រាំ អាចធ្ងន់ធ្ងរ
ក្រុមវេជ្ជបណ្ឌិតជំនាញបានព្រមានថាស្ថានភាពជំងឺកូវីដ១៩ របស់ប្រធានាធិបតីអាមេរិក ដូណាល់ ត្រាំ ប្រហែលជាធ្ងន់ធ្ងរ។ ប៉ុន្តែក្រុមគ្រូពេទ្យព្យាបាលលោកត្រាំបាននិយាយ កាលពីថ្ងៃអាទិត្យថា លោកដូណាល់ ត្រាំ ហាក់បានប្រសើរ ហើយលោកអាចចេញពីមន្ទីរពេទ្យ នៅថ្ងៃចន្ទ ទី៥ តុលានេះ ដោយពួកគេអះអាងថា ស្ថានភាពលោកធូរស្រាល បើទោះបីជាកម្រិតអុកស៊ីសែនធ្លាក់ទាបក៏ដោយ។
ទីភ្នាក់ងារសារព័ត៌មានសិង្ហបុរី CNA បានចេញផ្សាយ នាព្រឹកថ្ងៃទី៥ តុលានេះថា ក្រុមវេជ្ជបណ្ឌិតដែលមិនពាក់ព័ន្ធនឹងការព្យាបាលលោកដូណាល់ត្រាំបានអះអាថា លោកត្រាំបានចាប់ផ្តើមប្រើប្រាស់វិធីព្យាបាលលើប្រភេទជំងឺច្រើនមុខ ដើម្បីបន្ថយឥទ្ធិពលវីរុសកូវីដ១៩ ដែលនេះគឺជាភស្តុតាងច្បាស់ថា ករណីជំងឺកូវីដ១៩របស់លោកអាចនឹងធ្ងន់ធ្ងរ។
វេជ្ជបណ្ឌិត Daniel McQuillen ជំនាញជំងឺឆ្លង នៅមណ្ឌលព្យាបាលមួយក្នុង រដ្ឋ Massachusetts បានលើកឡើងថា « អ្វីដែលខ្ញុំបានដឹងពីសន្និសីទសារព័ត៌មាន គឺថាលោកប្រធានាធិបតីមានបញ្ហាជំងឺធ្ងន់ធ្ងរ ជាងការបង្ហាញតាមរយៈរូបភាព»។
ជាមួយគ្នានេះ លោកវេជ្ជបណ្ឌិត Stuart Cohen ប្រធានទទួលបន្ទុកជំងឺឆ្លង នៅមន្ទីរពេទ្យ UC Davis Health ស្ថិតក្នុងរដ្ឋ California ទើបបាននិយាយថា អ្នកជំងឺក្នុងវ័យ៧៤ឆ្នាំ លើសទម្ងន់ គឺប្រឈមខ្លាំងចំពោះជំងឺប្រភេទនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។