ម្សិលមិញ! លង់ទឹកស្លាប់ ៥នាក់ ឆក់ខ្សែភ្លើងស្លាប់ម្នាក់ និងរន្ទះបាញ់ងាប់គោ ១ក្បាល នៅខេត្តបន្ទាយមានជ័យ
បន្ទាយមានជ័យ៖ យ៉ាងហោណាស់ក៏មានមនុស្សក្មេងចាស់ចំនួន ៥នាក់ បានស្លាប់ដោយសារលង់ទឹក ពីទីកន្លែងផ្សេងគ្នា រីឯម្នាក់ទៀត ស្លាប់ដោយឆក់ខ្សែភ្លើង និងសត្វគោ១ក្បាលត្រូវរន្ទះបាញ់ បានកើតឡើងកាលពីថ្ងៃទី១៥ ខែតុលា ឆ្នាំ២០២០ នៅខេត្តបន្ទាយមានជ័យ។
បើតាមរបាយការណ៍របស់ស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា ជនរងគ្រោះទាំង៥នាក់ ដែលលង់ទឹកស្លាប់នោះ ករណីទី១.ឈ្មោះ ម៉ន វួន ភេទប្រុស អាយុ៤៥ឆ្នាំ ជាមនុស្សសតិមិនប្រក្រតី នៅក្រុងសិរីសោភ័ណ, ករណីទី២.ឈ្មោះ ឈៀ មង្គល អាយុ៦ឆ្នាំ នៅស្រុកមង្គលបូរី, ករណីទី៣.ម្តាយនិងកូន២នាក់ បានលង់ទឹកស្លាប់ នៅចំណុចអាងគ្រុឌ មានឈ្មោះ សន ស្រីអឿង ភេទស្រី អាយុ១៦ឆ្នាំ (ត្រូវជាកូន) និងឈ្មោះ លីន សាង អាយុ៤២ឆ្នាំ និងករណីទី៤.ឈ្មោះ វិន មេសា អាយុ១ឆ្នាំ ០៤ខែ។ នៅក្នុងថ្ងៃដដែលនោះ ភ្លៀងធ្លាក់លាយឡំនិងផ្គររន្ទះ សត្វ១ក្បាល ក៏ត្រូវរន្ធះបាញ់ងាប់ភ្លាមៗផងដែរ។
ដោយឡែក នៅវេលាម៉ោង៨យប់ ថ្ងៃទី១៥ ខែតុលា ឆ្នាំ២០២០ដដែល បុរសម្នាក់ ឈ្មោះ នី ណុយ អាយុ២៦ឆ្នាំ នៅភូមិទ្រលោកលិច ឃុំភ្នំលៀប ស្រុកព្រះនេត្រព្រះ បានឆក់ចរន្តអគ្គីសនីស្លាប់ ខណៈពេលជនរងគ្រោះដើរទៅផ្ទះបាយបើកកុងតាក់ភ្លើង ប៉ះចំខ្សែភ្លើងដាច់ បណ្តាលឲ្យឆក់ស្លាប់ខណៈពេលបញ្ជូនទៅមន្ទីរពេទ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។