បង្ក្រាបគ្រឿងញៀនជាង ២០គីឡូក្រាម នៅច្រកព្រំដែនកម្ពុជា-ឡាវ ខេត្តស្ទឹងត្រែង
ខេត្តស្ទឹងត្រែង៖ គ្រឿងញៀនជាង ៤០កញ្ចប់ ត្រូវបាននាំឆ្លងដែនពីប្រទេសជិតខាង ចូលមកកម្ពុជា តាមខេត្តស្ទឹងត្រែង ត្រូវបង្ក្រាបបាននាវេលាម៉ោងជាង៣ទៀបភ្លឺ ថ្ងៃទី២៣ ខែតុលា ឆ្នាំ២០២០នេះ លើកំណាត់ផ្លូវ១ខ្សែ ក្នុងតំបន់ព្រំដែនកម្ពុជា-ឡាវ ស្ថិតក្នុងភូមិសាស្ត្រ ស្រុកបុរីអូរស្វាយសែនជ័យ ខេត្តស្ទឹងត្រែង។
ករណីនេះ ធ្វើឡើងខណៈដែលសមត្ថកិច្ច បានចុះល្បាត នៅតាមបណ្តោយខ្សែបន្ទាត់ព្រំដែន ហើយបានប្រទះឃើញអ្នកជិះម៉ូតូម្នាក់ ស្ពាយការ៉ុងពីក្រោយ ដោយសង្ស័យកម្លាំងល្បាត ស្ទាក់ចាប់ជនសង្ស័យ តែជនសង្ស័យបានផ្តួលម៉ូតូ ហើយក៏រត់គេចខ្លួនចូលព្រៃបាត់។
សមត្ថកិច្ចបានឆែកឆេរម៉ូតូ និងការ៉ុងចំនួន២នោះ បានឆែករកឃើញ ម្សៅក្រាមសថ្លាសង្ស័យជាថ្នាំញៀន ប្រភេទមេតំហ្វេតាមីន មានចំនួន ៤២កញ្ចប់ ទម្ងន់ជាង ២០គីឡូក្រាម។ បច្ចុប្បន្នវត្ថុតាងទាំងនេះ បញ្ជូនកងរាជអាវុធហត្ថខេត្តស្ទឹងត្រែង ដើម្បីចាត់ការទៅតាមជំនាញគ្រឿងញៀន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។