លទ្ធផលស្ទងមតិលោកបៃដិន នៅតែបន្តយកឈ្នះលោកត្រាំ ខណៈការបោះឆ្នោតជិតមកដល់
សារព័ត៌មាន CNA នៅព្រឹកថ្ងៃអង្គារ ទី០៣ ខែវិច្ឆិកា ឆ្នាំ២០២០ បានផ្សាយថា បេក្ខជនប្រធានាធិបតីតំណាងឱ្យគណបក្សប្រជាធិបតេយ្យ លោក ចូ បៃដិន នៅតែបន្តនាំមុខលោក ដូណាល់ ត្រាំ ទាំងនៅក្នុងការស្ទង់មតិថ្នាក់ជាតិ និងរដ្ឋគោលៗ (Swing States) មួយចំនួនធំ មុននឹងការបោះឆ្នោតប្រធានាធិបតីអាមេរិកឆ្នាំ២០២០ នៅថ្ងៃទី០៣ ខែវិច្ឆិកានេះ (ម៉ោងនៅរដ្ឋធានីវ៉ាស៊ីនតោន)។ ទោះជាបែបនេះក្តី លោក ដូណាល់ ត្រាំ នៅតែជឿថាការស្ទង់មតិនេះគឺ «ក្លែងក្លាយ» ហើយលោកនឹងជាប់ឆ្នោតមួយអាណត្តិទៀត។
បើតាមការស្ទង់មតិថ្នាក់ជាតិថ្មីមួយទៀត ធ្វើឡើងដោយស្ថាប័ន រៀលក្លៀរផូលីធីកស៍ (RealClearPolitics) លោក បៃដិន នៅតែបន្តនាំមុខលោក ត្រាំ ៦.៨ពិន្ទុ ឬស្មើនឹង ៥០.៧ភាគរយ ទល់នឹង ៤៣.៩ភាគរយ ខណៈការស្ទង់មតិរបស់គេហទំព័រ ហ្វាយសឺតធីអេច (FiveThirtyEight.com) បានបង្ហាញថា បុរសវ័យ ៧៧ឆ្នាំរូបនេះនាំមុខលោក ត្រាំ ដែលមានអាយុ ៧៤ឆ្នាំ ដល់ទៅ ៨.៤ពិន្ទុឯណោះ។ ទោះជាយ៉ាងណា ការបោះឆ្នោតនៅសហរដ្ឋអាមេរិក មិនមែនកំណត់រកអ្នកឈ្នះ ឬចាញ់ ដោយសំឡេងបោះឆ្នោតពីប្រជាជនអាមេរិកតែមួយមុខនោះទេ។
លោក ត្រាំ ផ្ទាល់ក៏បានអះអាងដែរថា ការស្ទង់មតិនេះគឺក្លែងក្លាយ ហើយលោកនឹងជាប់ឆ្នោតមួយអាណត្តិទៀត ស្របពេលលោក បៃដិន និយាយថា វាដល់ពេលហើយ ដែលត្រូវបញ្ចប់ភាពចលាចលនៃការដឹកនាំ ០៤ឆ្នាំមកនេះក្រោមរដ្ឋបាលលោក ត្រាំ។
គួរជម្រាបថា ដើម្បីជាប់ឆ្នោតជាប្រធានាធិបតីអាមេរិក លោក ដូណាល់ ត្រាំ ឬលោក ចូ បៃដិន រកសំឡេងអ្នកបោះឆ្នោតតំណាង ២៧០រូប ក្នុងចំណោមអ្នកបោះឆ្នោតតំណាងសរុបទាំង ៥៣៨រូប។ នៅក្នុងការបោះឆ្នោតប្រធានាធិបតីអាមេរិក ឆ្នាំ២០២០នេះ រដ្ឋចម្បងៗឬហៅថា Swing States ចំនួន០៨ ជាពិសេសគឺរដ្ឋផ្ល័ររីដា (Florida) និងរដ្ឋភែនស៊ីលវេនៀ (Pennsylvania) ត្រូវបានគេជឿជាក់ថា នឹងក្លាយជាអ្នកកំណត់អ្នកឈ្នះចាញ់រវាងលោក ត្រាំ និងលោក បៃដិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។