ប្រជាជនហ្វីលីពីន ស្លាប់កើនដល់១១នាក់ហើយ ដោយសារព្យុះទីហ្វុង Vamco
ហ្វីលីពីន៖ សារព័ត៌មាន AFP ចេញផ្សាយនៅថ្ងៃសុក្រនេះថា ចំនួនប្រជាជនហ្វីលីពីនស្លាប់ដោយសារការវាយប្រហាររបស់ព្យុះទីហ្វុង Vamco បានកើនឡើងដល់១១នាក់ហើយ។ ក្រុមសង្គ្រោះបន្ទាន់បានជម្លៀសពលរដ្ឋដែលកំពុងជាប់គាំងនៅលើដំបូលផ្ទះ នៅថ្ងៃព្រហស្បតិ៍ម្សិលមិញ ក្រោយខ្យល់ព្យុះដ៏កំណាចនេះបានបង្កឱ្យមានទឹកជំនន់នៅក្នុងរដ្ឋធានីម៉ានីល និងខេត្តមួយចំនួនទៀតនៅលើកោះ លូហ្សូន។
ប្រភពបានឱ្យដឹងថា ព្យុះទីហ្វុន Vamco ក៏បានការផ្តាច់ចរន្តអគ្គិសនីទ្រង់ទ្រាយធំ នៅផ្នែកជាច្រើននៃទីក្រុងម៉ានីល និងខេត្តជាច្រើនទៀតផងដែរ។ បើតាមទីភ្នាក់ងារឧតុនិយមហ្វីលីពីន កម្លាំងខ្យល់បក់នៃព្យុះនេះមានចន្លោះពី១៣០ទៅ២០០គីឡូម៉ែត្រក្នុងមួយម៉ោង ហើយវាកំពុងរំកិលឆ្ពោះទៅកាន់សមុទ្រចិនខាងត្បូង។
សូមជម្រាបថា Vamco គឺជាព្យុះទីហ្វុនទី៣ហើយ ដែលបានបោកបក់មកលើប្រទេសហ្វីលីពីន ចាប់តាំងពីយប់ថ្ងៃពុធសប្តាហ៍នេះ និងនាំមកនូវខ្យល់បោកបក់យ៉ាងសន្ធប់ លាយឡំនិងភ្លៀងធ្លាក់ខ្លាំង ដែលបង្កឱ្យមានការរអិលបាក់ដី និងទឹកជំនន់ភ្លាមៗនៅតាមតំបន់ដែលធ្លាប់រងការវាយប្រហារ ដោយព្យុះទីហ្វុង ហ្គោនី កាលពីដើមខែតុលាកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។