កូវីដ១៩ នៅលើពិភពលោកបន្តកើនឡើង, អាមេរិកនឹងចាក់វ៉ាក់សាំងការពារ ដល់ពលរដ្ឋនៅថ្ងៃទី១២ខែធ្នូ ឆ្នាំ២០២០
គិតដល់ម៉ោង៧ព្រឹកថ្ងៃទី២៤ខែវិច្ឆិកានៅទូទាំងពិភពលោក មានចំនួនអ្នកឆ្លងកូវីដ១៩ កើនឡើងដល់ទៅ 59.474.810 នាក់ ក្នុងនោះមានអ្នកស្លាប់កើនឡើងដល់1.401.410 នាក់ផងដែរ ។
រយៈពេលប៉ុន្មានថ្ងៃចុងក្រោយនេះ ចំនួនអ្នកឆ្លងកូវីដ១៩ កើនឡើងខ្ពស់ ពិសេស នៅក្នុងតំបន់អឺរ៉ុប ។ អ៊ីតាលីជាប្រទេសមានករណីឆ្លងច្រើនជាងគេបំផុត នាពេលនេះដោយមានអ្នកឆ្លងក្នុងរយៈពេល២៤ម៉ោងកន្លងមក ដល់ទៅ50.453 នាក់ និងស្លាប់ ៦៣០ នាក់។ ការឆ្លងរាលដាលច្រើន បានធ្វើឲ្យក្រុមហ៊ុនផលិតវ៉ាក់សាំង ជំរ៉ុញឲ្យរដ្ឋាភិបាលប្រទេសរបស់ខ្លួន អនុម័ត ប្រើប្រាស់វ៉ាក់សាំងជាបន្ទាន់ ក្រោយធ្វើតេស្តមានប្រសិទ្ធភាពជាង ៩០ភាគរយ។
នៅពេលនេះអាមេរិក ក៏បានឡើងគម្រោងចាក់វ៉ាក់សាំងដល់ពលរដ្ឋទូទៅចាប់ពីថ្ងៃទី១២ខែធ្នូឆ្នាំ២០២០។ ប្រធានយុទ្ធនាការអភិវឌ្ឍន៍កូវីដ-១៩បន្ទាន់ (Warp Speed) បានឲ្យដឹងថា ពលរដ្ឋអាមេរិកនឹងទទួលបានការចាក់វ៉ាក់សាំងប្រឆាំងកូវីដ-១៩នៅពាក់កណ្តាលខែធ្នូឆ្នាំ២០២០។
សារព័ត៌មាន NBC បានដកស្រង់សម្តីលោក Moncef Slaoui ទីប្រឹក្សាកម្មវិធីអភិវឌ្ឍន៍វ៉ាក់សាំងប្រឆាំងកូវីដ-១៩ ដែលបានប្រកាសថា «នៅថ្ងៃទី១១ឬ១២ខែធ្នូខាងមុខនេះពលរដ្ឋអាមេរិកដំបូងគេបង្អស់នឹងទទួលបានការចាក់វ៉ាក់សាំងប្រឆាំងកូវីដ-១៩នៅតាមបណ្តារដ្ឋទូទាំងសហរដ្ឋអាមេរិក ។ លោក Moncef Slaoui បានបញ្ជាក់ថា «ក្នុងរយៈពេល២៤ម៉ោង ក្រោយការអនុម័តពីនាយកដ្ឋានចំណីអាហារនិងឱសថអាមេរិក (FDA) វ៉ាក់សាំងប្រឆាំងកូវីដ-១៩នឹងត្រូវបានចែកចាយចាក់បង្ការដល់ពលរដ្ឋអាមេរិកហើយ។
លោក Moncef Slaoui បានឲ្យដឹងថា វ៉ាក់សាំងនឹងត្រូវបានចែកចាយទៅតាមចំនួនពលរដ្ឋ នៅក្នុងរដ្ឋនិីមួយៗ។ បុគ្គលិកជូរមុខនិងមនុស្សវ័យចំណាស់ទទួលបានការចាក់វ៉ាក់សាំងមុនគេបង្អស់។ លោក Moncef Slaoui បន្តទៀតថា គោលដៅគឺចាក់វ៉ាក់សាំងបង្ការដល់ពលរដ្ឋអាមេរិកយ៉ាងតិច៧០%នៅទូទាំងប្រទេស។
ជាមួយគ្នានេះដែរ (FDA) នឹងបើកកិច្ចប្រជុំនៅថ្ងៃទី១០ខែធ្នូ ដើម្បីអនុញ្ញាតច្បាប់ប្រើប្រាស់វ៉ាក់សាំងប្រឆាំងកូវីដ-១៩ជាបន្ទាន់ ផលិតដោយក្រុមហ៊ុន Pfizer របស់អាមេរិក និងក្រុមហ៊ុនដៃគូ BioNTechរបស់អាល្លឺម៉ង់។ ជាមួយគ្នានេះដែរក្រុមហ៊ុន Moderna និឹងស្នើសុំច្បាប់អនុញ្ញាតប្រើប្រាស់វ៉ាក់សាំងបន្ទាន់ផងដែរនៅចុងខែធ្នូ ឆ្នាំ២០២០នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។