ឃាត់ខ្លួនបុរសម្នាក់ ពីបទរំលោភសេពសន្ថវៈលើក្មេងស្រី ២នាក់ បានសម្រេចជាច្រើនដង នៅស្រុកភ្នំក្រវាញ
ខេត្តពោធិ៍សាត់៖ បុរសម្នាក់ ត្រូវបានកម្លាំងសមត្ថកិច្ច ឃាត់ខ្លួនពីករណីរំលោភសេពសន្ថវៈលើក្មេងស្រីចំនួន ២នាក់ជាច្រើនលើក នៅក្នុងភូមិវាលវង់ ឃុំរកាត ស្រុកភ្នំក្រវាញ ខេត្តពោធិ៍សាត់។
សមត្ថកិច្ចជំនាញ បានឲ្យដឹងថា ក្រោយទទួលពាក្យបណ្ដឹងពីបងស្រីត្រូវជាម្តាយជនរងគ្រោះ បានប្ដឹងពីបទរួមភេទជាមួយអនីតិជនអាយុក្រោម១៥ឆ្នាំ កាលពីថ្ងៃទី៥ ខែវិច្ឆិកា ឆ្នាំ២០២០ ដែលបង្កឡើងដោយជនសង្ស័យឈ្មោះ យ័ន្ត គយ ភេទប្រុស អាយុ៤៦ឆ្នាំ រស់នៅភូមិ-ឃុំកើតហេតុ។
ក្នុងពាក្យបណ្តឹងម្តាយក្មេងស្រីរងគ្រោះ បានរៀបរាប់ថា ជនសង្ស័យ បានចាប់ក្មេងស្រីរងគ្រោះ (ត្រូវជាកូនចុង) ដោយរួមភេទបានសម្រេចជាមួយកុមាររងគ្រោះ ជាច្រើនលើកមកហើយ។ បន្ទាប់មក ជនសង្ស័យក៏បានបន្តចាប់រំលោភក្មេងស្រីម្នាក់ទៀត (ត្រូវជាចៅចុង) ដោយរួមភេទបានសម្រេចជាច្រើនដងដូចគ្នាផងដែរ។
ករណីនេះ សមត្ថកិច្ច កសាងសំណុំរឿងបញ្ជូនជនសង្ស័យទៅកាន់ការិយាល័យជំនាញនៃស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។