រដ្ឋបាលខេត្តកោះកុង ប្រកាសបិទការនេសាទ នៅពាមក្រសោប ធ្វើឲ្យតម្លៃត្រីកាម៉ុង បន្តហក់ឡើងខ្ពស់
កោះកុង៖ ត្រីកាម៉ុង ជាត្រីសមុទ្រមួយប្រភេទ ត្រូវបានពលរដ្ឋកម្ពុជា ទទួលស្គាល់ថា មាននៅតែក្នុងខេត្តចំនួន៤ ជាប់សមុទ្រនៃប្រទេសកម្ពុជា គឺខេត្តកោះកុង កំពត កែប និងខេត្តព្រះសីហនុ។ ត្រីសមុទ្រមួយប្រភេទនេះ កំពុងទទួលរងហានិភ័យខ្ពស់ពីការនេសាទ ខុសច្បាប់របស់ក្រុមឈ្មួញខិលខូចមួយចំនួន ស្របពេលដែលវាកំពុងពងកូន។
មន្ត្រីជលផលនៃមន្ទីរកសិកម្មខេត្តកោះកុង អះអាងថា ប្រភេទត្រីកាម៉ុងបច្ចុប្បន្ន កំពុងប្រឈមនឹងការនេសាទខុសច្បាប់ គ្រប់រដូវកាល ជាហេតុនាំឲ្យផលត្រីប្រភេទនេះកាន់តែថមថយទៅៗ។
កោះកុងជាខេត្ត ដែលមានតំបន់សហគមន៍ ជាច្រើន ក្នុងនោះពាមក្រសោបក៏ជាតំបន់សហគមន៍នេសាទសមុទ្រ ដែលបច្ចុប្បន្នត្រូវបានក្រសួងកសិកម្ម រុក្ខាប្រមាញ់ និងនេសាទ កាត់បញ្ចូលជាតំបន់គ្រប់គ្រងដែនជម្រកសុវត្ថិភាពត្រីកាម៉ុង ដែលមួយផ្នែកស្ថិតក្នុងភូមិសាស្ត្រឃុំពាមក្រសោប ស្រុកមណ្ឌលសីមា និងមួយផ្នែកទៀតស្ថិតក្នុងឃុំកោះកាពិ ស្រុកកោះកុង ដែលមានទំហំ ១.២៨៣ហិកតា។
ពាក់ព័ន្ធនឹងការបង្កើតតំបន់គ្រប់គ្រងដែនជម្រកសុវត្ថិភាពត្រីកាម៉ុង កាលពីថ្ងៃទី២៥ ខែវិច្ឆិកា ឆ្នាំ២០២០ រដ្ឋបាលខេត្តកោះកុង បានចេញសេក្តីជូនដំណឹងស្តីពីការបិទនេសាទត្រីកាម៉ុង ក្នុងដែនជម្រកសុវត្ថិភាពត្រីកាម៉ុងនៅពាមក្រសោប។ ការចេញសេក្តីជូនដំណឹងនេះ ធ្វើឡើងក្រោយពេលដែលមន្ត្រីជំនាញជលផល ចុះធ្វើការណែនាំដល់ប្រជានេសាទ ទាំងអស់ហាមមិនឲ្យធ្វើការនេសាទនៅជុំវិញ និងក្នុងដែនជម្រកនេះឡើយ ដោយសារកំលុងពេលនេះជារដូវកាលត្រីកំពុងពងកូន។
ក្នុងរដូវធ្លាក់ខ្យល់ត្រជាក់ តម្លៃត្រីកាម៉ុងនៅលើទីផ្សារតែងតែមានការហក់ឡើងខ្ពស់ជារៀងរាល់ឆ្នាំ សម្រាប់ពេលនេះតម្លៃនៅលើទិផ្សារ ១៥.០០០រៀល ក្នុងមួយគីឡូក្រាម នៅលើទីផ្សារខេត្តកោះកុង។ ក្រោយពិនិត្យឃើញថា ប្រភេទត្រីកាម៉ុង កាន់តែមានការថមថយខ្លាំង ក្រុមការងារសហគមន៍ ជំនាញជលផល នៃមន្ទីរកសិកម្ម សហការនិងរដ្ឋបាលខេត្ត សម្រេចបិទការនេសាទត្រីកាម៉ុង ក្នុងដែនជម្រកសុវត្ថិភាពត្រីកាម៉ុងនៅពាមក្រសោប រយៈពេល ៤ខែ ចាប់ពីថ្ងៃទី០១ ខែធ្នូ ដល់ថ្ងៃទី៣១ ខែមិនាឆ្នាំ២០២០ បន្ទាប់ពីសិក្សាឃើញថា ត្រីកាម៉ុង ផ្តើមពងកូន ក្នុងចន្លោះខែវិច្ឆិកា និងខែធ្នូ ដែលពេលកន្លងមក ការបិទនេសាទ បានផ្តើមបិទតែរយៈពេលខ្លី គឺចាប់ពីខែមករា ដល់ខែមិនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។