មន្ត្រីឧទ្យានុរក្ស ចុះដកហូត និងប្រមូលអន្ទាក់ ក្នុងដែនជម្រកសត្វព្រៃភ្នំព្រេច
ខេត្តមណ្ឌលគិរី៖ នៅក្នុងសប្ដាហ៍ទី២ ខែធ្នូ ឆ្នាំ២០២០នេះ មន្ត្រីរដ្ឋបាលការពារ និងអភិរក្សធម្មជាតិ និងមន្ត្រីឧទ្យានុរក្សដែនជម្រកសត្វព្រៃភ្នំព្រេច បានប្រមូលកម្លាំងចុះល្បាតរួមគ្នានៅក្នុងភូមិសាស្ត្រតំបន់ការពារធម្មជាតិ និងនៅតំបន់សហគមន៍ ដោយមានការចូលរួមពីភ្នាក់ងារល្បាតសហគមន៍តំបន់ការពារធម្មជាតិ និងបុគ្គលិកអង្គការ WWF ក្នុងនោះបានដោះប្រមូល និងសាអន្ទាក់ខ្សែគោប្រមាណជា២០ខ្សែ, ដកហូតកាំភ្លើងខ្យល់ចំនួន១ដើម, ដុំឆក់២ អាគុយ២ និងរណារយន្តចំនួន១គ្រឿងយកទៅរក្សាទុកនៅស្នាក់ការបរិស្ថាន។
ក្នុងប្រតិបត្តិការខាងលើនេះ មន្ត្រីរដ្ឋបាលការពារ និងអភិរក្សធម្មជាតិ និងមន្ត្រីឧទ្យានុរក្សដែនជម្រកសត្វព្រៃភ្នំព្រេច ក៏បានធ្វើការអប់រំ ណែនាំ និងធ្វើកិច្ចសន្យាទៅលើមនុស្សចំនួន៤នាក់ កុំឲ្យប្រព្រឹត្តបទល្មើសធនធានធម្មជាតិ និងទទូចឲ្យមានការចូលរួមការពារ និងអភិរក្សធនធានធម្មជាតិ និងជីវៈចម្រុះឲ្យបានកាន់តែប្រសើរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។