អាសូរណាស់! ក្មេងប្រុសស្រី២នាក់ ប្រទះឃើញលង់ទឹកស្លាប់
បន្ទាយមានជ័យ៖ ក្មេងប្រុស-ស្រីចំនួន០២នាក់ អាយុ៥ឆ្នាំ និងម្នាក់ទៀតអាយុ៦ឆ្នាំ បានលង់ទឹកស្លាប់ បន្ទាប់ពីសុំម្តាយទៅមុជទឹកលេង។ ករណីនេះ បានកើតឡើងរសៀល ថ្ងៃទី២២ ខែធ្នូ ឆ្នាំ២០២០ នៅចំណុចក្លងជិក(អូរធំ) ក្នុងភូមិរស្មីសាមគ្គី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
នគរបាលមូលដ្ឋាន បានឲ្យដឹងថា ក្មេងរងគ្រោះទាំង២នាក់ ឈ្មោះ ម៉ៅ ដាវ ភេទប្រុស អាយុ០៥ឆ្នាំ និងម្នាក់ទៀតឈ្មោះ វ៉ង់ វិដា ភេទស្រី អាយុ០៦ឆ្នាំ។ ក្មេងទាំង០២នាក់ ជាបងប្អូនជីដូនមួយនិងគ្នា រស់នៅភូមិរស្មីសាមគ្គី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
មុនពេលកើតហេតុ ក្មេងទាំង២នាក់ បានសុំម្តាយទៅចុះងូតទឹកលេង លុះមួយសន្ទុះក្រោយមក ឃើញក្មេងរងគ្រោះទាំង០២នាក់ បានឡើងមកវិញហើយ រួចចូលងូតទឹកអាងនៅក្នុងផ្ទះ។ ក្រោយមក ស្រាប់តែបាត់មាត់ក្មេងទាំង២នាក់នោះ ម្តាយក៏ដើរទៅរកតែមិនឃើញ ស្រាប់តែឃើញខោអាវនៅមាត់អូរ គាត់បានចុះរាវមើល ក៏ប្រទះឃើញកូនស្រី និងក្មួយប្រុស លង់ទឹកស្លាប់បាត់ទៅហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។