តំបន់ការពារទេសភាពបឹងព្រែកល្ពៅ ទទួលបានការចាប់អារម្មណ៍ពីអ្នកទេសចរណ៍
ខេត្តតាកែវ៖ បើតាមអង្គការ BirdLife International Cambodia Programme បញ្ជាក់ថា ក្រោយពីទទួលបានដំណឹងពីការផ្សព្វផ្សាយ ស្តីពីវត្តមានសត្វស្លាប (ពិសេសសត្វក្រៀល និងកំណត់ត្រាថ្មី នៃសំបុកពងកូនសត្វចង្កៀលខ្យង) នៅតំបន់ ការពារទេសភាពបឹងព្រែកល្ពៅ ដែលមានទីតាំងស្ថិតនៅក្នុងស្រុកកោះអណ្តែត និងបូរីជលសារ ខេត្តតាកែវ មក មានអ្នកស្រឡាញ់ធម្មជាតិមួយចំនួន បានទាក់ទងមកក្រុមការងារយើង ដើម្បីទៅទស្សនា ប៉ុន្តែដោយបញ្ហាCOVID 19 និងតំបន់មិនទាន់រៀបចំសេវាទេសចរណ៍ធម្មជាតិ ទើបយើងមិនទាន់ទទួល។
តែទោះជាយ៉ាងណាមានអ្នកទេសចរណ៍២ក្រុម បានពុះពារទៅដល់តំបន់យើងក្នុងខែធ្នូនេះ។ សត្វស្លាបជាច្រើនប្រភេទ បានបង្ហាញខ្លួនដល់អ្នកទេសចរណ៍ទាំងនេះ រួមមាន សត្វក្រៀល ចង្កៀលខ្យង ត្រយ៉ងខ្លួនរលង ទាកាបព្រៃក្បាលឆ្នូតស ជើងទៀនជាដើម។
ក្រោយទស្សនា អ្នកទេសចរណ៍មានអារម្មណ៍សប្បាយរីករាយដោយបានឃើញហ្វូងសត្វជាច្រើនក្នុងតំបន់ការពារនេះព្រមទាំងកោតសរសើរដល់មន្ត្រីឧទ្យានុរក្សសហការជាមួយអង្គការដៃគូទាំងអស់ និងអាជ្ញាធរដែនដីនូវការខិតខំប្រឹងប្រែងការពារតំបន់ដីសើមនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។