អង្កររបស់កម្ពុជា ក្នុងឆ្នាំ២០២០ នាំចេញបានជិត ៧០ម៉ឺនតោន
ភ្នំពេញ៖ យោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងឆ្នាំ២០២០ កម្ពុជាបាននាំចេញអង្ករសរុបប្រមាណ ៦៩ម៉ឺនតោន ដែលមានតម្លៃជិត ៥៣៩លានដុល្លារអាមេរិក កើនឡើង ១១,៤០ភាគរយ បើធៀបនឹងឆ្នាំ២០១៩។ ចំណែកការនាំចេញស្រូវមានប្រមាណ ២,៨៩លានតោន ដែលមានតម្លៃ ៧២៣លានដុល្លារអាមេរិក ហើយការនាំចេញស្រូវត្រូវបានធ្វើឡើងសម្រាប់ប្រទេសជិតខាង ជាពិសេស ប្រទេសវៀតណាម។
ក្រុមហ៊ុនកម្ពុជាចំនួន៧៦ បាននាំចេញទៅកាន់ទីផ្សារអន្តរជាតិចំនួន ៦០ ប្រទេសនៅក្នុងឆ្នាំ២០២០ ដោយប្រទេសចិនឈរនៅលំដាប់ទី១ ជាប្រទេសនាំចូលអង្ករពីកម្ពុជាក្នុងបរិមាណជិត ២៩ម៉ឺនតោនស្មើ ៤១,៩ភាគរយនៃការនាំចេញអង្ករសរុប។ រីឯទីផ្សារសហភាពអឺរ៉ុបឈរនៅលំដាប់ទី២ ដោយមានបរិមាណ ២០ម៉ឺនតោនស្មើនឹង ២៩,៥០ ភាគយ។
ជាមួយគ្នានេះប្រទេស៦ ក្នុងតំបន់អាស៊ាន ក៏បាននាំអង្ករពីកម្ពុជា ចំនួន ៨ម៉ឺន ៦ពាន់តោន ដែលស្មើនឹង ១២,៥៨ភាគរយ ហើយក្រៅពីនោះមានប្រទេស ២៩ ផ្សេងទៀតនៅតំបន់ផ្សេងៗ ក៏បានរួមចំណែកនាំចូលអង្ករពីកម្ពុជាចំនួន ១១ម៉ឺនតោនស្មើនឹង ១៦,០២ភាគរយ។
សូមបញ្ជាក់ថា បរិមាណប្រមូលផលស្រូវសរុបមានចំនួន ១០,៩៣លានតោន កាលពីឆ្នាំ២០២០ នៃផ្ទៃដីប្រមូលសរុបចំនួន ៣,៤លានហិកតា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។