ពិភពលោកមានពលរដ្ឋជិត ៩២លាននាក់ឆ្លងកូវីដ១៩
បើទោះបីមានប្រទេសជាច្រើនបានចាក់វ៉ាក់សាំងកូវីដ១៩ ជូនពលរដ្ឋជាច្រើនហើយក្តី ប៉ុន្តែចំនួនអ្នកឆ្លងនៅតែមិនថយចុះនោះឡើយ នៅតែមានករណីឆ្លងច្រើនដដែល។ តាមតួលេខរបស់គេហទំព័រ Worldometers នៅថ្ងៃទី១៣ខែមករា បានផ្សាយថា នៅទូទាំងពិភពលោកមានករណីឆ្លងកូវីដ១៩ កើនឡើងដល់ទៅ 91.988.471 នាក់ និងស្លាប់កើនឡើង 1.968.622 នាក់ ។ ជាមួយគ្នានោះដែរ ក៏មានអ្នកជំងឺ ៦៥,៨លាននាក់បានជាសះស្បើយ។
តំបន់អាមេរិក ខាងជើង មានចំនួនអ្នកឆ្លងច្រើនជាងគេ ដោយមានអ្នកឆ្លងសរុប ២៦,៦លាននាក់ ។ ផ្ទុយទៅវិញតំបន់អឺរ៉ុប មានចំនួនអ្នកស្លាប់ច្រើនជាងគេ ដោយមានអ្នកស្លាប់ ដល់ទៅ 600.303 នាក់ ។ ចំណែកទ្វីបអាស៊ី ឈរលំដាប់ទីបី មានអ្នកឆ្លងជាង២១,៦លាននាក់ និងស្លាប់350.805 នាក់។ តំបន់អាមេរិក ខាងត្បូង មានអ្នកឆ្លង ១៤,១លាននាក់ ស្លាប់379.709 នាក់។ ជាមួយគ្នានេះដែរចំនួនអ្នកឆ្លងនៅក្នុងទ្វីបអាហ្វ្រិក និង អូសេអានី ក៏មានចំនួនអ្នកឆ្លងកើនឡើងផងដែរ។
នៅតំបន់អាមេរិកខាងជើង សហរដ្ឋអាមេរិក មានអ្នកឆ្លង ដល់ទៅ23.368.225 នាក់ និងស្លាប់ 389.599 នាក់។ រដ្ឋាភិបាលរបស់លោកត្រាំ នឹងចេញច្បាប់ស្នើដល់ ជនបរទេសទៅកាន់អាមេរិកត្រូវតែធ្វើតេស្តអវិជ្ជមាន ជាមុនសិន ច្បាប់ថ្មីនឹងចូលជាធរមាននៅថ្ងៃទី២៦ខែមករាឆ្នាំ២០២១។ នៅក្នុងតំបន់អឺរ៉ុប រុស្ស៊ីជាប្រទេសដែល មានករណីឆ្លងច្រើនជាងគេបង្អស់ ដោយមានអ្នកឆ្លង កើនឡើងដល់ 3.448.203 នាក់ ។ ចំណែកអង់គ្លេសមានអ្នកឆ្លងជាង៣,១លាននាក់ ។ ប្រទេសដែលមានករណីឆ្លងកូវីដ១៩ លើសពី១លាននាក់ភាគច្រើនស្ថិតនៅតំបន់អឺរ៉ុប ។
នៅទ្វីបអាស៊ី ឥណ្ឌាមានករណីឆ្លងច្រើនជាងគេ ដោយមានអ្នកឆ្លងសរុប10.495.816 នាក់ និងស្លាប់151.564នាក់។ ចំណែកនៅក្នុងតំបន់អាស៊ានវិញ ប្រទេសឥណ្ឌូនេស៊ី ឈរលំដាប់ទី១ មានអ្នកឆ្លង ច្រើនជាងគេ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។