World Cup ៖ អាហ្សង់ទីនស្ពឹកមុខដោយសារក្រូអាត
កីឡា ៖ ការប្រកួតបាល់ទាត់យប់មិញ ពិតជាបានឃើញច្បាស់ថា ក្រុមក្រូអាត មានទម្រង់លេងល្អ ចង្វាក់នៃការកាត់ចរន្តលេងរបស់ក្រុមអាហ្សង់ទីន ពិតជាមានប្រសិទ្ធភាពមែន។ លទ្ធផលយប់មិញ និងការលេងមិនល្អរបស់អាហ្សង់ទីន គឺមកពីក្រូអាតបានកាត់ផ្ដាច់ចង្វាក់លេងរបស់ Messi ។
ការដឹងរបៀបលេងរបស់អាហ្សង់ទីន និងការចេះចាប់កីឡាករសំខាន់ឬកីឡាករនាំលេងក្នុងក្រុម បានធ្វើឱ្យក្រូអាត ទទួលបានលទ្ធផលជោគជ័យ រហូតយកជ័យជម្នះលើក្រុមអាហ្សង់ទីនបានដល់ ៣-០ ឯណោះ។ គ្រាប់បាល់បញ្ចូលទីដ៏រីករាយរបស់ក្រូអាតធ្វើបានសម្រេចជាបន្តបន្ទាប់ដោយ Ante Rebic នៅនាទី៥៣ Luka Modric នាទី៨០ និង Ivan Rakitic នៅនាទី៩០+១ ។
អាហ្សង់ទីនស្ថិតក្នុងស្ថានភាពដ៏លំបាកបំផុត បើទោះបីជាមិនទាន់បាត់បង់ឱកាស១០០ភាគរយក៏ដោយ បន្ទាប់ពីពួកគេបញ្ចប់ក្នុងលទ្ធផលស្មើ ១-១ ជាមួយអ៊ីស្លង់នាការប្រកួតបើកឆាក។ ក្រុមខ្លាំងអាមេរិកឡាទីនមួយនេះ ទើបរកបាន១ពិន្ទុប៉ុណ្ណោះ ដោយរង់ចាំមើលជំនួបរវាងអ៊ីស្លង់ និងនីហ្សេរីយ៉ា។
សរុបរួម ក្រុមក្រូអាតក្លាយជាក្រុមទី៤ដែលទទួលបានកៅអីទៅកាន់វគ្គ១៦ក្រុមចុងក្រោយ បន្ទាប់ពីបារាំង ម្ចាស់ផ្ទះរុស្ស៊ី និងអ៊ុយរូហ្គាយ ខណៈប៉េរូ ត្រូវហាលអាវជាមួយម៉ារ៉ុក អារ៉ាប៊ីសាអូឌីត និងអេហ្សីុប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។