យោធាមីយ៉ាន់ម៉ា ប្រកាសតែងតាំងមន្ត្រី ១១រូប ក្នុងរដ្ឋបាលថ្មី បន្ទាប់ពីដកតំណែងរដ្ឋមន្ត្រី និងអនុរដ្ឋមន្ត្រី ២៤រូប
មីយ៉ាន់ម៉ា៖ យោធាមីយ៉ាន់ម៉ាបានប្រកាសលុបចោលនូវមន្ត្រីជាន់ខ្ពស់មួយចំនួនក្នុងជួររដ្ឋាភិបាល ដែលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី តាមរយៈការដករដ្ឋមន្ត្រី និងអនុរដ្ឋមន្ត្រីចំនួន២៤រូប ដោយតែងតាំងជំនួសមកវិញនូវមន្ត្រីចំនួន១១រូបក្នុងរដ្ឋបាលថ្មីរបស់ខ្លួន បន្ទាប់ពីការធ្វើរដ្ឋប្រហារដណ្តើមអំណាច។
ការប្រកាសខាងលើនេះត្រូវបានធ្វើឡើងនៅលើកញ្ចក់ទូរទស្សន៍ដែលស្ថិតក្រោមការគ្រប់គ្រងរបស់របបយោធា Myawadday ដែលក្នុងនោះក៏រួមមានទាំងការតែងតាំងថ្មីនូវថ្នាក់ដឹកនាំក្រសួងហិរញ្ញវត្ថុ សុខាភិបាល ព័ត៌មាន កិច្ចការបរទេស ការពារជាតិ ព្រំដែន និងមហាផ្ទៃជាដើម ។
សូមជម្រាបថា លោកស្រី អ៊ុង សាន ស៊ូជី រួមទាំងមន្ត្រីជាន់ខ្ពស់ជាច្រើនរូប នៃរដ្ឋាភិបាលរបស់លោកស្រី ត្រូវបានយោធាមីយ៉ាន់ម៉ាចាប់ឃុំខ្លួននៅថ្ងៃចន្ទដើមសប្តាហ៍នេះ ។
បច្ចុប្បន្នយោធាមីយ៉ាន់ម៉ាកំពុងគ្រប់គ្រងស្ថានការណ៍ ហើយកងទ័ពជាច្រើនត្រូវបានដាក់ពង្រាយនៅតាមដងផ្លូវក្នុងរដ្ឋធានីណៃពិដោរ និងទីក្រុងយ៉ាងហ្គន។ ចំណែកឯបណ្ដាញទូរស័ព្ទ អ៊ីនធើណិត និងប្រព័ន្ធទំនាក់ទំនងនានានៅក្នុងរដ្ឋធានី ក៏ដូចជានៅតាមទីក្រុងធំៗក៏ត្រូវបានកាត់ផ្ដាច់ផងដែរ ខណៈប្រព័ន្ធផ្សព្វផ្សាយរដ្ឋមីយ៉ាន់ម៉ាអះអាងថា វាបណ្ដាលមកពីបញ្ហាបច្ចេកទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។