ពលរដ្ឋរិះគន់អាជ្ញាធរស្រុកស្អាង រឿងយកដីក្បែរទន្លេចាក់សំរាមបំពុលបរិស្ថាន
កណ្តាល៖ ប្រជាពលរដ្ឋរស់នៅក្នុងស្រុកស្អាងបាននិយាយថា ដីឆ្នេរទន្លេបាសាក់ស្ថិតនៅខាងក្រោយផ្សារស្អាងខាងត្បូង ក្នុងភូមិព្រែករុនក្រោម ឃុំព្រែកគយ ស្រុកស្អាង បច្ចុប្បន្ននេះបានក្លាយទៅជាទីលានចាក់សំរាមរបស់អាជីវករហើយ មិនតែប៉ុណ្ណោះ នៅពេលដែលគំនរសំរាមចេះតែគរច្រើនទៅៗ គឺគេបានយកភ្លើងដុតបណ្តាលអោយមានផ្សែងបំពុលបរិស្ថានធ្វើអោយប៉ះពាល់សុខភាពប្រជាពលរដ្ឋយ៉ាងធ្ងន់ធ្ងរទៀតផង។
ប្រជាពលរដ្ឋនិយាយថា ដីឆ្នេរទន្លេគួរណាតែរៀបចំធ្វើការអភិវឌ្ឍន៍ ដោយមិនគួរបណ្តោយឲ្យមានការដាក់សំរាមដែលធ្វើឲ្យប៉ះពាល់ដល់បរិស្ថាននោះទេ។
តែបើតាមការបង្ហើបរបស់ប្រជាពលរដ្ឋខ្លះទៀតថា ដីឆ្នេរទន្លេបាសាក់នោះ គឺជាដីកំពង់ផែផ្តាច់មុខរបស់លោក នៃ ចារី អភិបាលរងខេត្តកណ្តាល ហើយកន្លងមកលោក នៃ ចារី បានចាត់អោយកូនចៅធ្វើរបងហ៊ុព័ទ្ធដីនេះដោយបង្គោលថ្មនិងលួសសំណាញ់ តែក៏ត្រូវប្រជាពលរដ្ឋលួចបំផ្លិចបំផ្លាញអស់ទៅវិញ ។
យ៉ាងណាក៏ដោយ ចំពោះរឿងដីនេះ លោក ម៉ឹង យូឡេង ប្រធានមន្ទីរសាធារណៈការ និង ដឹកជញ្ជូនខេត្តកណ្តាល បានបញ្ជាក់ថា ដីឆ្នេរទន្លេនៅចំណុចខាងក្រោយផ្សារស្អាងខាងត្បូងនោះ មិនមែនជាដីរបស់បុគ្គលណានោះទេ គឺជាដីរបស់ក្រសួងសាធារណៈការនិងដឹកជញ្ជូនមានប្លង់ជាដីកំពង់ផែដែលក្រសួងទុកអភិវឌ្ឍធ្វើកំពង់ផែសម្រាប់បងប្អូនអាជីវករខ្មែរយើងសាងផ្លាស់ប្តូរទំនិញ។
ចំណែកអភិបាលស្រុកស្អាង លោក ញឹម វណ្ណឌិន មិនអាចសុំការបំភ្លឺបានទេ ដោយសារទូរស័ព្ទរបស់លោកទាក់ទងមិនចូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។