រថយន្តដាច់ហ្វ្រាំង រអិលថយក្រោយចុះពីលើស្ពានព្រែកតាមាក់ កិនស្ត្រីម្នាក់ ស្លាប់យ៉ាងអាណោចអាធម៌
ខេត្តកណ្ដាល៖ ករណីគ្រោះថ្នាក់ចរាចរណ៍ដ៏រន្ធត់មួយ បង្កឡើងដោយរថយន្តធុនធំ១គ្រឿង ប្រភេទបែនដឹកដី បានដាច់ហ្វ្រាំង រអិលថយក្រោយចុះពីស្ពានព្រែកតាមាក់យ៉ាងលឿន ជ្រុលបុកចូលអាហារដ្ឋាន១កន្លែង កិនស្លាប់ស្ត្រីម្នាក់ និងរងរបួសធ្ងន់ម្នាក់។
ហេតុការណ៍នេះ បានកើតឡើង កាលពីវេលាម៉ោង៨យប់ ថ្ងៃទី២៤ កុម្ភៈ ឆ្នាំ២០២១នេះ នៅជិតគល់ស្ពានព្រែកតាមាក់ត្រើយកើត ស្ថិតនៅភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្តាល។
សមត្ថកិច្ចបានឲ្យដឹងថា មុនពេលកើតហេតុ គេឃើញរថយន្តធុនធំជាប្រភេទបែនដឹកដី១គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3B.3894 បើកក្នុងទិសដៅពីកើតទៅលិច ខណៈបើកឡើងស្ពានព្រែកតាមាក់ បម្រុងឆ្លងទន្លេ ឆ្ពោះទៅត្រើយលិច ផ្លូវជាតិលេខ៥នោះ ស្រាប់តែរថយន្តដាច់ហ្វ្រាំង រអិលថយក្រោយចុះពីលើស្ពានបោះពួយយ៉ាងលឿន បុកចូលអាហារដ្ឋានយីហោ«អាក្លូ មីង៉ោ» ទាំងកម្រោល បណ្ដាលឲ្យបុកកិនស្ដ្រីម្នាក់ ជាម្ដាយម្ចាស់ហាងស្លាប់ នៅក្រោមកង់រថយន្ត រីឯម្ចាស់ហាងរបួសធ្ងន់។ ក្រោយកើតហេតុ អ្នកបើកបរ បានរត់គេចបាត់ស្រមោល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។