ក្រុមហ៊ុនផលិតដែកវៀតណាម ចង់បង្កើតរោងចក្រក្នុងខេត្តព្រះសីហនុ
ព្រះសីហនុ ៖ ក្រុមហ៊ុនផលិតដែកធំមួយរបស់វៀតណាមឈ្មោះ Hoa Phat កាលពីដើមសប្ដាហ៍នេះ បានប្រកាសឲ្យដឹងថា ខ្លួនមានគម្រោងសាងសង់រោងចក្រផលិតដែក នៅលើផ្ទៃដីប្រមាណពី ១០០ ទៅ ១៥០ហិកតា ក្នុងខេត្តព្រះសីហនុ ។
លោក Chu Quang Vu ប្រធាននាយកដ្ឋានស្រាវជ្រាវ និងអភិវឌ្ឍន៍ នៃក្រុមហ៊ុន Hoa Phat ក្នុងជំនួបជាមួយអភិបាលខេត្តព្រះសីហនុកាលពីពេលថ្មីៗនេះ បានឲ្យដឹងថា បច្ចុប្បន្នក្រុមហ៊ុនកំពុងតែដំណើរការផលិតដែកធំជាងគេនៅក្នុងប្រទេសវៀតណាម ហើយក្រុមហ៊ុនចង់បង្កើតរោងចក្រផលិតដែកនៅក្រៅប្រទេស ដោយជ្រើសរើសយកប្រទេសកម្ពុជា ពិសេសខេត្តព្រះសីហនុ ដែលគ្រោងចំណាយទុនវិនិយោគប្រមាណ ៥០០លានដុល្លារអាមេរិក។ តាមការគ្រោងទុក រោងចក្រនឹងត្រូវការកម្លាំងពលកម្មប្រមាណ ៣.០០០នាក់ ។ហើយរោងចក្រ នឹងមានសមត្ថភាពផលិតដែកចាប់ពី ១លានទៅ ២លានតោន ក្នុងមួយឆ្នាំ។
ជាការឆ្លើយតបលោក យន្ត មីន អភិបាលខេត្តព្រះសីហនុបានថ្លែងស្វាគមន៍ចំពោះគម្រោងរបស់ក្រុមហ៊ុន Hoa Phat ដោយបានចង្អុលបង្ហាញទីតាំងឱ្យក្រុមហ៊ុនចាប់អារម្មណ៍ នោះគឺនៅតំបន់ដែលនៅក្នុងស្រុកស្ទឹងហាវ ព្រោះអនាគតទីនោះក៏មានកំពង់ផែទឹកជ្រៅ និងមានដីប្រហែល ២០០ហិកតា អាចឱ្យក្រុមហ៊ុនសាងសង់រោងចក្របានងាយស្រួល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។