រមណីយដ្ឋាន «ទឹកធ្លាក់ភ្នំខៀវ» នៅខេត្តប៉ៃលិន កំពុងទាក់ទាញភ្ញៀវទេសចរយ៉ាងខ្លាំង
ខេត្តប៉ៃលិន៖ រមណីយដ្ឋាន «ទឹកធ្លាក់ភ្នំខៀវ ឬទឹកធ្លាក់អូរតាវ៉ៅ» ដែលស្ថិតក្នុងទឹកដី នៃខេត្តប៉ៃលិន បាននឹងកំពុងទាក់ទាញភ្ញៀវទេសចរជាតិ និងអន្តរជាតិ ឲ្យទៅទស្សនាតំបន់ដ៏ស្រស់បំព្រងមួយនេះយ៉ាងខ្លាំង។ តំបន់ធម្មជាតិនៅភាគខាងលិច នៃដែនដីសុវណ្ណភូមិនេះ មានទឹកធ្លាក់រហូតដល់ទៅ ៧ជាន់ ស្ថិតនៅភូមិកូនខ្លុង សង្កាត់ឣូរតាវ៉ៅ ក្រុងប៉ៃលិន និងមានចម្ងាយប្រមាណ ៧គីឡូម៉ែត្រ ពីទីរួមខេត្តប៉ៃលិន។
រមណីយដ្ឋាន «ទឹកធ្លាក់ភ្នំខៀវ» មានស្ទឹងធម្មជាតិដែលមានទឹកថ្លាឆ្វង់ មានជ្រោះទឹកហូរធ្លាក់បែកផ្កាត្រែងលើល្បាក់ថ្មដាយ៉ាងខ្ពស់ មានខ្យល់អាកាសត្រជាក់ដល់ក្រអៅបេះដូង ដែលធ្វើឲ្យភ្ញៀវទេសចរជាតិ និងអន្តរជាតិទៅលេងយ៉ាងសប្បាយរីករាយក្រៃលែង។ បន្ថែមលើនេះ បរិវេណកម្សាន្តត្រូវបានកែច្នៃឲ្យមានកន្លែងអង្គុយលេងជាច្រើន មានខ្ចូសអង្គុយ ហើយអាហារលក់ដូរមិនថ្លៃនោះទេ។ ជាមួយគ្នានេះ មានកន្លែងសម្រាប់ទុកដាក់យានយន្ត ដោយមានសន្តិសុខយាមកាមយ៉ាងល្អ មិនព្រួយបារម្ភពីការបាត់បង់ឡើយ។
កាលពីថ្ងៃទី២៨ ខែកុម្ភ: ឆ្នាំ២០២១ មន្ទីរឣង្គភាពពាក់ព័ន្ធ បានចុះពិនិត្យមើលការស្ថាបនាផ្លូវទៅកាន់ រមណីយដ្ឋាន «ទឹកធ្លាក់ភ្នំខៀវ» ដើម្បីលើកកម្ពស់សោភ័ណ្ឌភាព សម្តៅទាក់ទាញភ្ញៀវទេសចរបន្ថែមទៀត។
លោកជំទាវ បាន ស្រីមុំ បានណែនាំដល់ក្រុមការងារប្រចាំការនៅរមណីយដ្ឋានខាងលើ ត្រូវចេះរួសរាយរាក់ទាក់ មានស្នាមញញឹមជានិច្ច និងកុំប្រើពាក្យសម្តីមិនពិរោះទៅកាន់ភ្ញៀវទេសចរឡើយ។
សូមជម្រាបថា ដើម្បីទៅដល់រមណីយដ្ឋាន «ទឹកធ្លាក់ភ្នំខៀវ» គេត្រូវធ្វើដំណើរតាមផ្លូវជាតិលេខ៥៧ រហូតដល់ស្ពានថ្មអូរតាវ៉ៅ ហើយឡើងទៅប្រមាណជា ១០០ម៉ែត្រទៀត គេនឹងឃើញផ្លាកសញ្ញាបង្ហាញទីតាំង ត្រង់ម្ដុំផ្លូវបំបែកភូមិកូនខ្លុងពីខាងឆ្វេងដៃ។ គេក៏ត្រូវជិះបត់ចូលទៅប្រមាណ ៧គីឡូម៉ែត្រទៀត ទើបដល់ទីតាំងគួរជាទីមនោរម្យខាងលើនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។