រថយន្តដឹកដំឡូង បុក និងកិនស្លាប់បុរសម្នាក់ ខណៈកំពុងជិះម៉ូតូ នៅស្រុកភ្នំស្រុក
ខេត្តបន្ទាយមានជ័យ៖ បុរសម្នាក់ កំពុងបើកម៉ូតូត្រូវរថយន្តធុនធំបុក រួចកិន បណ្តាលឲ្យស្លាប់ភ្លាមៗនៅកន្លែងកើតហេតុ កាលពីវេលាម៉ោង១១យប់ ថ្ងៃទី០១ ខែមីនា ឆ្នាំ២០២១ ក្នុងភូមិគោករំចេក ឃុំស្រះជីក ស្រុកភ្នំស្រុក ខេត្តបន្ទាយមានជ័យ។
នគរបាលមូលដ្ឋាន បានឲ្យដឹងថា ជនរងគ្រោះឈ្មោះ ឈឿន ប្រុស ភេទប្រុសអាយុ៣១ឆ្នាំ នៅភូមិស្រះឈូកខាងកើត ឃុំស្រះជីក ស្រុកភ្នំស្រុក ខេត្តបន្ទាយមានជ័យ បានជិះម៉ូតូ១គ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅសេរី២០១១ ពាក់ស្លាកលេខ ប.មានជ័យ 1E.9205 មកពីបញ្ចូលទឹកស្រែប្រាំង ធ្វើដំណើរពីទិសខាងត្បូងទៅជើង លុះដល់ចំណុចកើតហេតុ ក៏មានរថយន្តធុនធំ១គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ- 3C.4649 ដឹកដំឡូងមី ធ្វើដំណើរច្រាសទិសគ្នា បានបុក និងកិនពីលើម៉ូតូ បណ្តាលឲ្យជនរងគ្រោះស្លាប់ភ្លាមៗតែម្តង។ ចំណែកអ្នកបើកបរ បានរត់គេចខ្លួនបាត់។
ក្រោយកើតហេតុ សមត្ថកិច្ចបានចុះវាស់វែង និងយកមធ្យោបាយទាំង២គ្រឿងមករក្សាទុកនៅអធិការដ្ឋាន នគរបាលស្រុកភ្នំស្រុករង់ចាំធ្វើការដោះស្រាយនៅពេលក្រោយ។ ចំណែកសពជនរងគ្រោះប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។