កម្ពុជា រកឃើញអ្នកឆ្លងកូវីដ១៩ថ្មី ៤៩នាក់ មាន៤៨នាក់ ជាករណីឆ្លងក្នុងសហគមន៍ និងមានជាសះស្បើយ ២១នាក់
ភ្នំពេញ៖ ក្រសួងសុខាភិបាល នៅរសៀលថ្ងៃទី០៩ ខែមីនា ឆ្នាំ២០២១នេះ បានប្រកាសរកឃើញអ្នកឆ្លងជំងឺកូវីដ១៩ ថ្មីចំនួន៤៩នាក់ ក្នុងនោះករណីឆ្លងក្នុងសហគមន៍នៃ «ព្រឹត្តិការណ៍២០កុម្ភៈ» ចំនួន៤៨នាក់ និងអ្នកជំងឺម្នាក់ ជាករណីធ្វើដំណើរមកពីបរទេស ខណៈអ្នកជាសះស្បើយ២១នាក់។
ក្រសួង បញ្ជាក់ទៀតថា អ្នកជំងឺឆ្លងក្នុងសហគមន៍៤៨នាក់ នោះមានជនជាតិចិន ២៨នាក់, ជនជាតិខ្មែរ ១៩នាក់ និងជនជាតិឥណ្ឌូនេស៊ីម្នាក់។ ចំណែកករណីនាំចូលវិញ គឺជាបុរសជនជាតិលីប៊ី ធ្វើដំណើរមកពីប្រទេសលីប៊ី មកដល់កម្ពុជា នៅថ្ងៃទី០៧ ខែមីនា ឆ្នាំ២០២១។
សម្រាប់អ្នកជាសះស្បើយទាំង២១នាក់វិញ គឺមានម្នាក់ជាជនជាតិស្វីស ដែលធ្វើដំណើរមកពីក្រៅប្រទេស និង២០នាក់ផ្សេងទៀត គឺជាអ្នកជំងឺដែលពាក់ព័ន្ធព្រឹត្តិការណ៍ «សហគមន៍ ២០កុម្ភៈ» ។
សូមជម្រាបថា គិតត្រឹមរសៀល ថ្ងៃទី០៩ ខែមីនា ឆ្នាំ២០២១នេះ កម្ពុជារកឃើញអ្នកឆ្លងកូវីដ១៩ សរុបចំនួន ១០៦០នាក់ ក្នុងនោះអ្នកជាសះស្បើយចំនួន ៥៣៨នាក់ និងអ្នកជំងឺសម្រាកព្យាបាលចំនួន ៥២១នាក់។ សម្រាប់អ្នកឆ្លងជំងឺកូវីដ១៩ ក្នុងសហគមន៍ ២០កុម្ភៈ គឺកើនឡើង ៥៤៩នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។