រថយន្តក្រុងដឹកសិស្សធ្លាក់ចូលជ្រោះ ស្លាប់ជិត៣០នាក់ នៅប្រទេសឥណ្ឌូនេស៊ី
រថយន្តក្រុងទេសចរណ៍មួយគ្រឿងត្រូវបានបើកធ្លាក់ចូលទៅក្នុងជ្រោះ នៅតំបន់កោះជ្វា ក្រោយមានបញ្ហាហ្វ្រាំង បណ្តាលឲ្យស្លាប់មនុស្សយ៉ាងតិច២៧នាក់ របួស៣៩នាក់ នេះបើតាមនគរបាលនិងក្រុមសង្គ្រោះបញ្ជាក់ឲ្យដឹង នាថ្ងៃទី១១ មីនា ២០២១នេះ។
មន្ត្រីនគរបាលជាន់ខ្ពស់ Eko Prasetyo Robbyanto ថា រថយន្តនេះផ្ទុកសិស្សវិទ្យាល័យឥស្លាម គ្រូបង្រៀន និងអាណាព្យាបាលសិស្ស ពីខេត្ត West Java ក៏ជួបបញ្ហាគ្រោះថ្នាក់ កាលពីយប់ថ្ងៃទី១០ មីនា។
លោកបន្តថា រថយន្តក្រុងមួយគ្រឿងនេះបានធ្លាក់ចូលទៅក្នុងជ្រោះ ជម្រៅ២០ម៉ែត្រ ក្រោយអ្នកបើកបរបាត់បង់ម្ចាស់ការ មិនអាចគ្រប់គ្រងចង្កូតបាន។
នគរបាលនៅតែស៊ើបអង្កេតករណីនេះ ប៉ុន្តែអ្នកនៅរស់រានមានជីវិតបាននិយាយថា ហ្វ្រាំងរថយន្តស្រាប់តែគាំងភ្លាមៗ ពេលកំពុងបើកបរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។