កម្លាំងយោធាចោទប្រកាន់លោកស្រី អោងសានស៊ូជីពីបទពុករលួយ
កម្លាំងយោធាមីយ៉ានម៉ា បានចោទប្រកាន់ លោកស្រី អោងសាន ស៊ូជី ទទួលរងការចោទប្រកាន់បន្ថែម ពីបទទទួលសំណូក ជាទឹកប្រាក់៦សែនដុល្លារ ។ តាមសារព័ត៌មានរ៉យទ័រ លោក Zaw Min Tun អ្នកនាំពាក្យកម្លាំងទាហាន បានបញ្ជាក់ ពីព័ត៌មានថាលោកស្រីស៊ូជីបានទទួលសំណូកពេលនៅកាន់តំណែង។ ក្រៅពីទឹកប្រាក់ ៦សែនដុល្លារ នៅទទួលបានមាសចំនួន១១,២ គីឡូក្រាមទៀតផង។ ពេលនេះក្រុមប្រឆាំងអំពើពុករលួយកំពុងបើកការស្រាវជ្រាវករណីខាងលើ។
នៅថ្ងៃទិ១១ខែមីនា ពលរដ្ឋជាច្រើនបាននាំគ្នាធ្វើបាតុកម្ម ប្រឆាំងរដ្ឋាភីបាល យោធាដដែល។ នៅថ្ងៃនេះ មានបាតុករដល់ទៅ ៧នាក់បានស្លាប់។ ចំណែក លោកស្រី អោងសាន ស៊ូជីវិញ រងការចោទប្រកាន់ថ្មីទៀតពីកម្លាំងយោធា ថាបានទទួលសំណូក ជាទឹកប្រាក់ ៦សែនដុល្លារ។
បុរសម្នាក់ដែលជួយដឹកអ្នករងរបួសទៅកាន់មន្ទីរពេទ្យ បាននិយាយទៅកាន់សារព័ត៌មានរ៉យទ័រថា នៅក្នុងស្រុក Myaing ភាគកណ្តាលនៃប្រទេសមីយ៉ានម៉ា មានបាតុករ៦នាក់ស្លាប់ ក្នុងពេលកម្លាំងសន្តិសុខបំបែកហ្វូងបាតុករដោយប្រើហិង្សា ។ បុរសវ័យ៣១ឆ្នាំបានបញ្ជាក់ថា «យើងខ្ញុំធ្វើបាតុកម្មដោយសន្តិវិធី តែកម្លាំងយោធាបានប្រើហិង្សាមកលើពួកយើង»។
ក្រៅពីនេះនៅតំបន់ North Dagon ក្នុងទីក្រុង Yangon ជាទីក្រុងសេដ្ឋកិច្ចធំបំផុតរបស់មីយ៉ានម៉ា ក៏មានបាតុករម្នាក់ស្លាប់ ផងដែរ។ គិតមកដល់ថ្ងៃទី១១ខែមីនា មានអ្នកស្លាប់ជាង ៦០នាក់ហយ និងបាតុករជាង២ពាន់នាក់ត្រូវយោធាចាប់ឃុំខ្លួនចាប់តាំងពីការធ្វើរដ្ឋប្រហារនៅថ្ងៃទី១ខែកុម្ភៈ។
អ្នកនាំពាក្យកម្លាំងទាហានមីយ៉ានម៉ា បានបដិសេធ ឆ្លើយរាល់សំណួរពីក្រុមអ្នកសារព័ត៌មាន ហើយបញ្ជាក់ថាថ្នាក់ដឹកនាំយោធា នឹងធ្វើសន្និសីទកាសែតនៅរដ្ឋធានីណៃពិដោ នាល្ងាចថ្ងៃទី១១ខែមីនា។នៅពេលយប់ពលរដ្ឋក៏បានរៀបចំពិធីបួងសួងនៅតាមផ្លូវ ក្នុងទីក្រុង យ៉ានហ្គន់ និងណៃពិដោ ដោយបានដុតទៀត ជាច្រើន ដើម្បីបន់ស្រន់។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។