ថ្ងៃនេះ កម្ពុជា បន្តរកឃើញអ្នកឆ្លងកូវីដ១៩ថ្មី ៦២នាក់ទៀត ខណៈមានអ្នកជាសះស្បើយ ២២នាក់
ភ្នំពេញ៖ ក្រសួងសុខាភិបាល នៅព្រឹកថ្ងៃទី១២ ខែមីនា ឆ្នាំ២០២១នេះ បានប្រកាសពីការបន្តរកឃើញអ្នកឆ្លងកូវីដ១៩ថ្មី ៦២នាក់ថែមទៀត ខណៈអ្នកជំងឺ ២២នាក់ បានជាសះស្បើយ។
ក្រសួង បញ្ជាក់ថា ក្នុងចំណោមអ្នកឆ្លងទាំង ៦២នាក់នោះ គឺមានអ្នកដំណើរមកពីក្រៅប្រទេស ២នាក់ ជាជនជាតិឥណ្ឌូនេស៊ី និងករណីឆ្លងសហគមន៍ ៦០នាក់ មានជនជាតិខ្មែរ ៤៤នាក់ ជនជាតិចិន ១៥នាក់ និងជនជាតិវៀតណាម ០១នាក់ រកឃើញនៅរាជធានីភ្នំពេញ ខេត្តកណ្តាល ព្រៃវែង និងកោះកុង។
ចំណែកអ្នកជាសះស្បើយទាំង ២២នាក់ មានជនជាតិចិន និងជនជាតិខ្មែរ នៅខេត្តព្រះសីហនុ និងរាជធានីភ្នំពេញ ដោយទទួលបានលទ្ធផលតេស្តអវិជ្ជមាន ២លើក និងបានអនុញ្ញាតឲ្យចេញពីកន្លែងព្យាបាល។
សូមជម្រាបថា គិតត្រឹមព្រឹក ថ្ងៃទី១២ ខែមីនា ឆ្នាំ២០២១នេះ កម្ពុជា បានរកឃើញអ្នកឆ្លងកូវីដ១៩ សរុបចំនួន ១២២៥នាក់ ក្នុងនោះអ្នកជាសះស្បើយចំនួន ៦១៩នាក់ អ្នកជំងឺកំពុងសម្រាកព្យាបាល ៦០៤នាក និងមានជំងឺស្លាប់ម្នាក់។ សម្រាប់អ្នកក្នុងសហគមន៍ ព្រឹត្តិការណ៍ ២០កុម្ភៈ គឺកើនឡើងសរុប ៧១២នាក់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។