ឃាត់ខ្លួនស្ត្រីបរទេស២នាក់ ករណីលួចបង្កប់គ្រឿងញៀនជាមួយសម្ភារឲ្យមិត្តភក្ភិ នៅមណ្ឌលធ្វើចត្តាឡីស័ក
ខេត្តព្រះសីហនុ៖ ស្ត្រីជនជាតិចិនម្នាក់ បានយកសម្ភារៈប្រើប្រាស់ឲ្យមិត្តភ័ក្ដិ នៅមណ្ឌលធ្វើចត្តាឡីស័ក ហើយត្រូវបានសមត្ថកិច្ចប្រចាំការគោលដៅឆែកឃើញមានថ្នាំញៀនជាច្រើនកញ្ចប់ កាលពីម៉ោង១០ និង៣០នាទីយប់ ថ្ងៃទី១៤ ខែមីនា ឆ្នាំ២០២១ នៅកាស៊ីណូមួយកន្លែង ក្នុងក្រុងព្រះសីហនុ។
សមត្ថកិច្ចមូលដ្ឋាន បានបញ្ជាក់ថា ស្ដ្រីជនជាតិចិនដែលឃាត់ខ្លួននោះ ឈ្មោះWANG SHISHI អាយុ២៥ឆ្នាំ ជាជនជាតិចិន បានជិះរថយន្ត១គ្រឿង ម៉ាកហាយ ឡេនឌ័រ ពណ៌ស ពាក់ស្លាកលេខ ព្រះសីហនុ2B-9017 ដោយបានយកសម្ភារៈប្រើប្រាស់ឲ្យមិត្តភ័ក្ដិ នៅមណ្ឌលធ្វើចត្តាឡីស័ក ដែលលួចបង្កប់នៅគ្រឿងញៀនជាកញ្ចប់។ ជនសង្ស័យ ត្រូវជំនាញ បាននាំខ្លួនទៅស្នងការដ្ឋាននគរបាលខេត្តព្រះសីហនុ ដើម្បីចាត់ការបន្តតាមនិតិវិធី។
សូមបញ្ជាក់ផងដែរថា នៅព្រឹកថ្ងៃដដែល សមត្ថកិច្ចក៏បានឃាត់ខ្លួននារីម្នាក់ ឈ្មោះ វិន គឹមហឹង ភេទស្រី អាយុ២៨ឆ្នាំ ជនជាតិវៀតណាម បានយកបាយ១ប្រអប់ ទៅឲ្យឈ្មោះ NGUYEN THUY LINH ភេទស្រី ជនជាតិវៀតណាមដូចគ្នា ដែលកំពុងធ្វើចត្តាឡីស័ក ហើយត្រូវបានក្រុមការងារប្រចាំគោលដៅ អគារស្នាក់នៅឆាងឆឹងកាស៊ីណូ ឆែករកឃើញម្សៅសថ្លា១កញ្ចប់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។