ឃាត់មនុស្ស ២នាក់ រឹបអូសគ្រឿងក្នុងជ្រូកខូចគុណភាព ៣តោន នាំចូលពីប្រទេសថៃ
ខេត្តបាត់ដំបង៖ កម្លាំងកងរាជអាវុធហត្ថខេត្តបាត់ដំបង បានចុះបង្ក្រាបបានគ្រឿងក្នុងជ្រូកខូចគុណភាពចំនួន ៣តោន ដែលឈ្មួញ នាំចូលពីប្រទេសថៃ តាមច្រករបៀងតាមតំបន់ព្រំដែន កាលពីយប់ថ្ងៃទី២១ ខែមីនា ឆ្នាំ២០២១ នៅត្រង់ចំណុចភូមិស្វាយ ឃុំបឹងរាំង ស្រុកកំរៀង ខេត្តបាត់ដំបង។
យោងតាមរបាយការណ៍ បានឱ្យដឹងថា ពោះវៀនជ្រូកខូចគុណភាពនោះ ត្រូវបានឈ្មូញដឹកតាមរថយន្តម៉ាកសាំយ៉ុង១គ្រឿង ចេញពីព្រំដែន បម្រុងយកទៅលក់ចែកចាយបន្តនៅលើទីផ្សារនានា ក្នុងប្រទេសកម្ពុជា។
ក្នុងប្រតិបត្តិការនោះ កងរាជអាវុធហត្ថរឹបអូស បានរថយន្ត ១គ្រឿង រួមនឹងគ្រឿងក្នុងជ្រូកខូចគុណភាពចំនួន ៣តោន និងឃាត់មនុស្សចំនួន ២នាក់ គឺឈ្មោះ ហម ចាន់រ៉ា ភេទប្រុស អាយុ៣៩ឆ្នាំ និងឈ្មោះ ឌី ធន ភេទប្រុស អាយុ ៣១ឆ្នាំ រស់នៅស្រុកសំពៅលូន ខេត្តបាត់ដំបង។
គួរបញ្ជាក់ថា គ្រឿងក្នុងជ្រូកខូចគុណភាពទាំងនោះ ត្រូវបានជំនាញ យកទៅកម្ទេចចោល កាលពីថ្ងៃទី២២ ខែមីនា ម្សិលមមិញ។ ចំណែកជនសង្ស័យ បានធ្វើការអប់រំ រួចឱ្យត្រឡប់ទៅលំនៅឋានវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។