ករណីឃាតកម្មអារ-ក សម្លាប់ប្រពន្ធជាង ២ខែមុន! ចាប់បានជនសង្ស័យហើយ
ខេត្តកំពង់ឆ្នាំង៖ សំណុំរឿងករណីឃាតកម្មអារ-ក សម្លាប់ប្រពន្ធជាង ២ខែមុន រហូតមកដល់ពេលនេះ សមត្ថកិច្ចខេត្តកំពង់ឆ្នាំង ចាប់ខ្លួនជនស្ស័យបានហើយ កាលពីយប់ ថ្ងៃទី២៩ ខែមីនា ឆ្នាំ២០២១ នៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។
នគរបាលខេត្តកំពង់ឆ្នាំង បានឲ្យដឹងថា ជនសង្ស័យដែលជាឃាតកនោះ ឈ្មោះ ម៉ី ម៉ាប់ ភេទប្រុស អាយុ ៣៥ឆ្នាំ រស់នៅភូមិស្រែអ៊ុក ឃុំតាំងក្រសាំង ស្រុកទឹកផុស ខេត្តកំពង់ឆ្នាំង។ រីឯជនរងគ្រោះមានឈ្មោះ អឿន រ៉េន ភេទស្រី អាយុ៣៣ឆ្នាំ មានលំនៅក្នុងភូមិ ឃុំខាងលើ។
គួររំលឹកថា ស្ត្រីរងគ្រោះ ជាស្ត្រីមេម៉ាយមានកូន២ បានទំនាក់ទំនងជាមួយជនសង្ស័យ និងបានរស់នៅជាមួយគ្នាជាប្តីប្រពន្ធ ជាង១ឆ្នាំ និងមានកូនម្នាក់ទៀតផងដែរ។ ប្តីប្រពន្ធទាំងពីរនាក់នេះ តែងតែទាស់សំដីគ្នា ហើយនៅថ្ងៃកើតហេតុ ស្ត្រីរងគ្រោះ បានធាក់ជនសង្ស័យមួយជើង បណ្តាលឲ្យដួលផ្ងាក្រោយ ដោយសារតែខឹង ក៏ស្ទុះទៅយកកាំបិតសៀតនឹងជញ្ជាំង ចាប់អារ.ក ស្ត្រីរងគ្រោះរហូតដល់ស្លាប់តែម្តង ហើយរត់គេចខ្លួនបាត់។ រហូតដល់ថ្ងៃទី២៩ ខែមីនា ជនសង្ស័យ បានវិលចូលមកខេត្តកំពង់ឆ្នាំងវិញ ដោយបានមកដេកនៅផ្ទះសំណាក់មួយ នៅក្នុងភូមិទួលក្រឡាញ់ ទើបចាប់បានតែម្តង។
បច្ចុប្បន្នជនសង្ស័យ ត្រូវបានសមត្ថកិច្ចកសាងសំណុំរឿង បញ្ជូនទៅតុលាការ ដើម្បីចាត់ការបន្តតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។