ករណីឆ្លងកូវីដ១៩ នៅក្នុងប្រទេសថៃ កើនឡើងខ្ពស់គួឲ្យបារម្ភ
ប្រទេសថៃ៖ សារព័ត៌មានថៃ Bangkok Post បានផ្សាយថា នៅថ្ងៃពុធ ទី០៧ ខែមេសា ឆ្នាំ២០២១នេះ អាជ្ញាធរគ្រប់គ្រងស្ថានការណ៍ COVID-19 នៅក្នុងប្រទេសថៃ បានប្រកាសពីការរកឃើញអ្នកឆ្លងជំងឺនេះ ៣៣៤នាក់ថ្មីទៀតដោយក្នុងនោះ ៣២៧នាក់ជាករណីឆ្លងក្នុងស្រុក និង ០៧នាក់ទៀតជាករណីនាំចូល។
នៅក្នុងរបាយការណ៍ប្រចាំថ្ងៃខាងលើនេះបានបញ្ជាក់ថា ក្នុងចំណោមករណីឆ្លង COVID-19 ក្នុងស្រុកទាំង ៣២៧ករណីនោះ គឺ ២១៦នាក់់ត្រូវបានរកឃើញ នៅទីក្រុងបាងកក, ២០នាក់នៅខេត្តសាកែវ, ១៥នាក់នៅខេត្តសាមុតប្រាកាន, ១២នាក់នៅខេត្តសាមុតសាខន, ០៨នាក់នៅខេត្តនុនថាបុរី, ០៦នាក់នៅខេត្តឈុនបុរី, ០២នាក់នៅខេត្តឈៀងម៉ៃ និងខេត្តមួយចំនួនទៀតមានអ្នកឆ្លងតិចតួច។
គួរបញ្ជាក់ថា គិតត្រឹមថ្ងៃពុធនេះថៃមានករណីឆ្លង COVID-19 សរុប ២៩,៩០៥ករណី ក្នុងនោះមានអ្នកស្លាប់ ៩៥នាក់ និងជាសះស្បើយឡើងវិញ ២៨,០៦៩នាក់ (ស្មើនឹង ៩៣%)។ ករណីឆ្លងថ្មីៗដែលត្រូវបានប្រកាសនៅថ្ងៃនេះ គឺជាការកើនឡើងកម្រិតខ្ពស់ថ្មីមួយទៀត លើសកាលពីថ្ងៃអង្គារម្សិលមិញ ដែលមានឆ្លង COVID-19 ចំនួន ២៥០ករណី ក្រោយការផ្ទុះករណីឆ្លងយ៉ាងច្រើន នៅទីកន្លែងកម្សាន្តមួយចំនួន ក្នុងទីក្រុងបាងកក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។