ខឹងប្រពន្ធមិនព្រមត្រូវរ៉ូវគ្នាវិញ អតីតប្តីបើកកង់បីដេញបុក និងចាក់ប្រពន្ធ ផ្អើលផ្សារលើខេត្តសៀមរាប
ស្ត្រីម្នាក់ត្រូវអតីតប្តីបើកម៉ូតូកង់បី (PassAPP)ដេញបុកនិងចាក់មួយកាំបិត បណ្តាលឲ្យរងរបួស កាលពីវេលាម៉ោង៩និង៣០នាទីយប់ថ្ងៃទី៦ ខែមេសា ឆ្នាំ២០២១ ស្ថិតនៅមុខកន្លែងលក់ផ្លែឈើ ផ្សារលើធំថ្មី ក្នុងភូមិដកពោធិ សង្កាត់ស្លក្រាម ក្រុង/ខេត្តសៀមរាប។
សាក្សីបានឲ្យដឹងថា មុនកើតហេតុ ពួកគាត់ឃើញបុរសម្នាក់បានអង្គុយ ក្នុង(PassAPP) ដែលចតនៅមុខកន្លែងលក់ផ្លែឈើ ផ្សារលើធំថ្មី ខណៈពេលនោះឃើញមានស្ត្រីម្នាក់និងក្មេងស្រីម្នាក់ ជិះម៉ូតូ មកកន្លែងលក់ផ្លែឈើ មួយសន្ទុះស្រាប់ឃើញបុរសអ្នកបើក(PassAPP) ដែលចតនៅមុខកន្លែងលក់ផ្លែឈើ នោះបើកចេញមកសំដៅស្ត្រីនោះ។ ប្រភពបានបន្តថា ក្រោយពីបើកដេញ បុកស្ត្រី ពេញផ្សារលើធំថ្មី បណ្តាលឲ្យម៉ូតូនិង (PassAPP) រួចមកក៏ឃើញបុរសនោះទាញកាំបិតចិតបន្លែ ចាក់មកលើស្ត្រីនោះចំនួន២កាំបិត ចាក់បុកចំពោះ ខាងក្រោមដោះ ផ្នែកខាងស្តាំ បណ្តាលឲ្យរបួសធ្ងន់ ត្រូវបានប្អូនស្រីដឹកយកទៅសង្គ្រោះនៅមន្ទីរពេទ្យឯក ជន ស៊ឹង រិទ្ធី រ៉េត។
ក្រោយចាក់អតីតប្រពន្ធរួច ជនបង្ករបានយកម៉ូតូរបស់ប្រជាការពារភូមិ ជិះចេញទៅបាត់ ដោយយកទៅទុកនៅផ្ទះរបស់ខ្លួនក្នុងភូមិខា្នរ សង្កាត់ជ្រាវ បន្ទាប់មកក៏បានគេចខ្លួនទៅបាត់។
តាមប្រភពពីសមត្ថកិច្ចថា ជនបង្កមានឈ្មោះ តាំង លាប ភេទប្រុសអាយុ៣៧ឆ្នាំមានស្រុកកំណើតនៅខេត្តកំពង់ចាម បច្ចុប្បន្នរស់នៅភូមិខ្នារ សង្កាត់ជ្រាវ ក្រុង/ខេត្តសៀមរាប ចំណែក ស្ត្រី ជនរងគ្រោះឈ្មោះ លាន ប៊ុន ណាត អាយុ៣៥ឆ្នាំរស់នៅភូមិ សង្កាត់ជាមួយគ្នា ហើយមានកូនចំនួន២ នាក់, កន្លងមក ជនបង្កបានព្យាយាមសុំត្រូវរ៉ូវគ្នាជាមួយប្រពន្ធវិញ តែភាគីខាងស្រីមិនព្រម ទើបកើតជារឿងទំនាស់រហូតបង្កហិង្សានេះឡើង។
យ៉ាងណាក៏ដោយ បច្ចុប្បន្នកម្លាំងជំនាញកំពុងសហការគ្នា ស្វែងរកតាមចាប់ខ្លួនជនបង្កដើម្បីយកមកផ្តន្ទាទោស ទៅតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។