ថៃ គ្រោងអនុវត្តផែនការឲ្យអ្នកជំងឺកូវីដ១៩ស្រាល ធ្វើចត្តាឡីស័កខ្លួនឯងនៅផ្ទះ
ថៃ៖ ក្រសួងសុខាភិបាលសាធារណៈរបស់ប្រទេសថៃ បានឆ្លើយតបទៅនឹងការកើនឡើងយ៉ាងគំហុកនៃឆ្លងវីរុស Covid-19 តាមរយៈការដាក់ចេញផែនការមួយ ដោយអនុញ្ញាតអោយអ្នកជំងឺស្រាលធ្វើចត្តាឡីស័កខ្លួនឯងនៅតាមផ្ទះ ដើម្បីទុកគ្រែពេទ្យសម្រាប់អ្នកជំងឺមានករណីធ្ងន់ធ្ងរ ។
ផែនការគ្រាអាសន្នខាងលើ ជាការឆ្លើយតបទៅនឹងការព្រួយបារម្ភកាន់តែខ្លាំងឡើងជុំវិញបញ្ហាខ្វះគ្រែពេទ្យ ដែលកាន់តែអស់នៅពេលប្រទេសអាស៊ីមួយនេះកំពុងជួបប្រទះករណីផ្ទុះវីរុសកូវីដ១៩នៅរលកទី៣ ហើយវិធានការនេះដែរ នឹងត្រូវប្រកាន់យកក្នុងករណីសភាពការណ៍កាន់តែអាក្រក់ទៅប៉ុណ្ណោះ។
យ៉ាងណាមិញ ក្រសួងសុខាភិបាលថៃកាលពីយប់ថ្ងៃចន្ទម្សិលមិញនេះបញ្ជាក់ថា ទោះជាចត្តាឡីស័កនៅតាមផ្ទះកំពុងស្ថិតក្រោមការពិចារណា ក៏វាមិនចាំបាច់ដែរពេលនេះដោយសារនៅសល់គ្រែពេទ្យ៣ពាន់ដែរ ដូច្នេះវានឹងមិនត្រូវអនុវត្តពេលនេះទេ ។
គួរបញ្ជាក់ថា នៅក្រោមផែនការចត្តាឡីស័កនៅតាមផ្ទះ អ្នកជំងឺកូវីដ១៩ត្រូវតែមិនចេញរោគសញ្ញា មានអាយុក្រោម៤០ឆ្នាំ និងមិនកើតរោគធាត់ជ្រុល មិនមានបញ្ហាសុខភាពផ្សេងៗ រួមមានរោគសួត ជំងឺក្រលៀន ជំងឺបេះដូងរ៉ៃរ៉ៃ ស្ត្រូក និងជំងឺផ្សេងទៀតដែលគ្រូពេទ្យគិតថា មិនមានសុវត្ថិភាពសំរាប់ចត្តាឡីស័កនៅផ្ទះ។ មន្ទីរពេទ្យនឹងតំរូវអោយចុះពិនិត្យអ្នកជំងឺប្រភេទនេះ ជាទៀតទាត់រាល់១៤ថ្ងៃ និងបញ្ជូនទៅមន្ទីរពេទ្យបើរោគសញ្ញាកាន់តែធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។