បិទទីតាំង ៦កន្លែងភ្លាមៗ ក្នុងក្រុងក្រុងប៉ោយប៉ែត ក្រោយពាក់ព័ន្ធអ្នកវិជ្ជមានកូវីដ១៩ លើបុរសជនជាតិឥណ្ឌូនេស៊ីម្នាក់
ខេត្តបន្ទាយមានជ័យ៖ អាជ្ញាធរខេត្តបន្ទាយមានជ័យ បានសម្រេចបិទអគារស្នាក់ភ្លាមៗ អាគារស្នាក់នៅចំនួន ២កន្លែង និងបុរីដួងច័ន្ទ រួមនឹង៣ទីតាំងបន្ថែម ក្នុងក្រុងប៉ោយប៉ែត បន្ទាប់ពីរកឃើញ ករណីវិជ្ជមានកូវីដ១៩ ទៅលើបុរស ជនជាតិឥណ្ឌូនេស៊ីម្នាក់ នៅយប់ថ្ងៃទី២២ ខែមេសា ឆ្នាំ២០២១ ដើម្បីជាវិធានការពារការរីករាលដាលនៃជំងឺកូវីដ១៩ នៅក្នុងសហគមន៍។
បុរសជនជាតិឥណ្ឌូនេស៊ីម្នាក់ ដែលបានស្នាក់នៅ ក្នុងបុរីដួងច័ន្ទ ផ្ទះលេខ ១៣៤B ស្ថិតនៅក្នុង ភូមិសាមគ្គីមានជ័យ សង្កាត់/ក្រុងប៉ោយប៉ែត ត្រូវបានអាជ្ញាធរខេត្តបន្ទាយមានជ័យ បានចុះទៅដល់ទីតាំងទាំងយប់ និងសម្រេចបិទខ្ទប់មិនអនុញ្ញាតឲ្យចេញចូល។
លោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានបញ្ជាក់ថា ជនជាតិឥណ្ឌូនេស៊ី ដែលរកឃើញវិជ្ជមានកូវីដ១៩នោះ កំពុងសម្រាកព្យាបាល នៅមន្ទីរពេទ្យមង្គលបុរី ក្រោយពីសាកសួរស្វែងរកអ្នកពាក់ព័ន្ធ កម្លាំងសមត្ថកិច្ចបានចុះហ៊ុំពទ្ធ័ផ្ទះ លេខ១៣៤B ក្នុងបុរីដួងច័ន្ធ ដោយសារ ប្រពន្ធជនជាតិឥណ្ឌូនេស៊ីរូបនេះ កំពុងស្នាក់នៅ រួចបន្តបិទបុរីនេះទាំងស្រុង ព្រមទាំងអាគារស្នាក់នៅ២ទីតាំង។ ដោយឡែកនៅព្រឹកថ្ងៃទី២៣ ខែមេសានេះ អាជ្ញាធរបានសម្រេចបិទ៣ទីតាំងបន្ថែមទៀត ដែលមានការពាក់ព័ទ្ធ ដោយសរុបទាំងអស់៦ទីតាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។