រថយន្តស៊ាំយ៉ុង បែកកង់រ៉េបុកកុងតឺន័រ រងរបួសមនុស្ស ២នាក់ នៅស្រុកស្រែអំបិល
ខេត្តកោះកុង៖ នៅវេលាម៉ោងជាង៦ព្រឹក ថ្ងៃទី២៣ ខែមេសា ឆ្នាំ២០២១នេះ មានករណីគ្រោះថ្នាក់ចរាចរណ៍មួយ រវាងរថយន្តកុងតឺន័រ បុករថយន្ដស៊ាំយ៉ុង បណ្ដាលឲ្យមនុស្សរងរបួសចំនួន ២នាក់ លើផ្លូវជាតិលេខ៤ ក្នុងភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង។
បើតាមរបាយការណ៍សមត្ថកិច្ច បានឲ្យដឹងថា មុនពេលកើតហេតុ មានរថយន្ត១គ្រឿង ម៉ាកស៊ាំយ៉ុង ពណ៌ស ពាក់ស្លាកលេខ ភ្នំពេញ2M-8096 បានបែកកង់ក្រោយខាងស្ដាំ ហើយរ៉េចង្កូតទៅបុកនឹងរថយន្ត១គ្រឿងទៀត ម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ 3A-2002 បើកក្នុងបញ្ច្រាសគ្នា បណ្តាលឲ្យមនុស្សចំនួន ២នាក់ បានរងរបួសតែម្តង។
ជនរងគ្រោះ ឈ្មោះ កៅ ព្រំ ភេទប្រុស អាយុ៣៩ឆ្នាំ អ្នកបើកបររថយន្តស៊ាំយ៉ាង (រងរបួសស្រាល) និងអ្នករួមដំណើរម្នាក់ ឈ្មោះ ឈឿន សាអែម ភេទស្រី អាយុ៤៩ឆ្នាំ រងរបួសបាក់ដៃម្ខាង។ អ្នកទាំង២ មានទីលំនៅភូមិកំពង់ត្រាចទី២ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
បច្ចុប្បន្នរថយន្តទាំង២គ្រឿង ត្រូវកម្លាំងជំនាញយកមករក្សាទុកនៅអធិការដ្ឋាននគរបាលស្រុកស្រែអំបិល។ ចំណែកជនរងគ្រោះ បានបញ្ជូនទៅមន្ទីរពេទ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។