ការងារសាងសង់សំណង់ស្ទាក់ទឹកស្ទឹងមង្គលបុរី ខេត្តបាត់ដំបង សម្រេចបាន ៥០%ហើយ!
គម្រោងសាងសង់សំណង់ស្ទាក់ទឹកស្ទឹងមង្គលបុរី ស្ថិតនៅឃុំតាក្រី ស្រុកកំរៀង ខេត្តបាត់ដំបង គឺដើម្បីរួមចំណែករកដំណោះស្រាយទឹក ជូនប្រជាកសិករសម្រាប់ស្រោចស្រពបន្ថែម លើផ្ទៃដីបង្កបង្កើនផលកសិកម្ម ស្រូវរដូវវស្សាចំនួន ១.៨៥០ហិកតា ស្រូវរដូវប្រាំង ចំនួន៣៦០ហិកតា ដំណាំរួមផ្សំចំនួន ៤៧០ហិកតា និងប្រើប្រាស់ប្រចាំថ្ងៃ ជូនប្រជាពលរដ្ឋចំនួន០៨ភូមិ មានចំនួន ២.២០៨គ្រួសារ ។
សំណង់ស្ទាក់ទឹកស្ទឹងមង្គលបុរី មានតួនាទីទទួលយកទឹកពីប្រភពទឹកមកពីប្រទេសថៃឡង់ត៍ ផ្ទៃរងទឹកភ្លៀងពីខេត្តប៉ៃលិន និងមួយផ្នែកទៀតពីផ្ទៃរងទឹកក្នុងតំបន់ ហើយហូរចូលទៅបឹងទន្លេសាប។ បច្ចុប្បន្នក្រុមការងារ សម្រេចបាន ៥០% ក្នុងទំហំការងារ រួមមាន ៖
-សាងសង់សំណង់ស្ទាក់ទឹក ចំនួន ០១កន្លែង លើស្ទឹងមង្គលបុរី
-សាងសង់ទំនប់សណ្តរស្ទឹងមង្គលបុរីប្រវែង ៣៥០ម
សូមបញ្ជាក់ថា ក្រោយពេលសាងសង់សំណង់ស្ទាក់ទឹកស្ទឹងមង្គលបុរី បានរួចរាល់តាមលក្ខណៈបច្ចេកទេសរបស់ក្រសួងធនធានទឹក និងឧតុនិយម សំណង់ស្ទាក់ទឹកស្ទឹងមង្គលបុរី នឹងមានលទ្ធភាពនាំទឹកយកមកសម្រាប់ធ្វើការស្រោចស្រព និងប្រើប្រាស់ក្នុងជីវភាពរស់នៅប្រចាំថ្ងៃបានយ៉ាងល្អប្រសើរ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។