អាមេរិកប្តេជ្ញារកប្រភពកូវីដ១៩, WHO ថាជារឿងមិនងាយស្រួលឡើយ
រដ្ឋមន្ត្រីការបរទេសអាមេរិក លោក Antony Blinken បានប្រកាសថា «រដ្ឋាភិបាលអាមេរិក បានប្តេជ្ញា ស្វែងរកប្រភពកូវីដ១៩ »។ ជាមួយគ្នានេះដែរ អង្គការសុខភាពពិភពលោកបានបញ្ជាក់ថា មិនមែនជារឿងងាយស្រួលឡើយ ការស្រាវជ្រាវត្រូវប្រើពេលវេលាជាច្រើនឆ្នាំទៀត។ ជាមួយគ្នានេះដែរ មន្ត្រីអង្គការសុខភាពពិភពលោក WHO បានប្រកាសឲ្យដឹងថា អង្គការនេះមិនអាចបង្ខំឲ្យចិនផ្តល់ព័ត៌មានណាមួយបន្ថែមទៀតឡើយស្តីពីប្រភពកូវីដ១៩។
នៅក្នុងសន្និសីទកាសែត កាលពីថ្ងៃទី៧ខែមិថុនា អ្នកសារព័ត៌មាន បានចោទសួរឡើង ថាតើអង្គការសុខភាពពិភពលោក អាចស្នើឲ្យចិនបង្ហាញពីប្រភពកូវីដ១៩បន្ថែមទៀត ។ អគ្គនាយកកម្មវិធីសុខភាពបន្ទាន់ របស់WHO លោក Kike Ryan បានបញ្ជាក់ថា «យើងមិនមានសិទ្ធិនៅក្នុងការដាក់គំនាប់ឲ្យអ្នកណាម្នាក់ ក្នុងនោះមានចិន លើបញ្ហាកូវីដ ១៩នោះឡើយ»។
លោក Mike Ryan បានបញ្ជាក់ថា «យើងសង្ឃឹមថានឹងទទួលបានកិច្ចសហប្រតិបត្តិការ និងជួយដល់បណ្តាប្រទេសជាសមាជិករបស់អង្គការ WHO »។ ការលើកឡើងខាងលើរបស់ WHO កើតឡើងក្រោយពេលដែល ប្រទេសជាច្រើន បានដាក់គំនាមឲ្យបើកការស្រាវជ្រាវបន្ថែមធ្វើឲ្យច្បាស់ពីប្រភពកូវីដ១៩ ។
កាលពីថ្ងៃទី២៧ខែឧសភា អាមេរិក បានអំពាវនាវដល់អង្គការWHO បើកការស្រាវជ្រាវ ដំណាក់កាលទីពីរ ស្តីពីប្រភពកូវីដ១៩ ។ ទីក្រុងវ៉ាស៊ីនតោនចង់ឲ្យការស្រាវជ្រាវលើកទីពីរធ្វើឡើងដោយឯករាជ្យ ក្នុងនោះមានការស្រាវជ្រាវមន្ទីរពិសោធរបស់ចិន។
ប្រភពកូវីដ១៩ បានក្លាយទៅជាវិវាទជាទ្រង់ទ្រាយធំរវាងអាមេរិកនិងចិន ។ អាមេរិក តែងតែលើកឡើងថាប្រភពកូវីដ ១៩ លិចចេញពីមន្ទីរពិសោធនៅទីក្រុងវូហានប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។