យុទ្ធនាការចុះយកគំរូស្រាស ស្រាថ្នាំ មកវិភាគរកសារធាតុមេតាណុល នៅកន្លែងផលិត និងកន្លែងលក់ទូទាំងប្រទេស
បន្ទាប់ពីថ្មីៗនេះ មានហេតុការពុលស្រាបានកើតឡើងជាបន្តបន្ទាប់នៅតាមបណ្តាខេត្តមួយចំនួន មានដូចជាខេត្តកណ្តាល ខេត្តកំពត ខេត្តពោធិសាត់ និងខេត្តព្រៃវែង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានណែនាំឱ្យមន្ត្រីអគ្គនាយកដ្ឋាន ក.ប.ប. ធ្វើការស្រាវជ្រាវរកទីតាំងផលិត ចែកចាយស្រាស ស្រាថ្នាំ ដែលមានសារធាតុពុល បង្កផលប៉ះពាល់ដល់សុខភាព និងអាយុជីវិតរបស់ប្រជាពលរដ្ឋ។
ទទួលបានការណែនាំនេះ ឯកឧត្តម ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. បានដាក់ចេញនូវយុទ្ធនាការឱ្យមន្ត្រីនៅតាមបណ្តាសាខា ក.ប.ប. រាជធានី ខេត្ត ចុះយកសំណាកគំរូស្រាស ស្រាថ្នាំ នៅតាមបណ្តាទីតាំងផលិត និងកន្លែងលក់ស្រាស ស្រាថ្នាំ ក្នុងក្របខណ្ឌទូទាំងប្រទេស មកវិភាគរកសារធាតុមេតាណុល នៅមន្ទីរពិសោធន៍របស់អគ្គនាយកដ្ឋាន ក.ប.ប.។
ជាក់ស្តែង ក្នុងខែមិថុនានេះ មន្ត្រីសាខា ក.ប.ប. នៅតាមបណ្តារាជធានី ខេត្តចំនួន ១៧ បានចុះយកគំរូស្រាស ស្រាថ្នាំមកវិភាគនៅមន្ទីរពិសោធន៍អគ្គនាយកដ្ឋាន ក.ប.ប. បានចំនួន ១៧៨គំរូ។ យោងលទ្ធផលវិភាគរបស់មន្ទីរពិសោធន៍បានបង្ហាញថា សំណាកគំរូស្រាទាំង ១៧៨ គំរូ ពុំមានវត្តមានសារធាតុមេតាណុលដែលជាសារធាតុបង្កគ្រោះឡើយ។
អគ្គនាយកដ្ឋានក.ប.ប. នឹងបន្តយុទ្ធនាការចុះអប់រំ ផ្សព្វផ្សាយការយល់ដឹង និងយកសំណាកគំរូស្រាស និងស្រាថ្នាំ ឱ្យបានគ្រប់រាជធានី ខេត្ត ពិសេសតំបន់ដាច់ស្រយាល មកវិភាគរកសារធាតុបង្កគ្រោះ ដើម្បីទប់ស្កាត់ករណីពុលស្រា មិនឱ្យកើតឡើងបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។