សម្ដេចក្រឡាហោម ព្រមានមន្ដ្រីនគរបាលពន្លត់អគ្គិភ័យ កុំឲ្យទារលុយពីពលរដ្ឋ
នៅក្នុងពិធីប្រគល់រថយន្តពន្លត់អគ្គិភ័យ ដល់អង្គភាពជំនាញ និងស្នងការនគរបាលរាជធានី-ខេត្ត នៅព្រឹកថ្ងៃទី២២ ខែសីហា នេះ នៅក្រសួងមហាផ្ទៃ, សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានព្រមានមន្ត្រីនគរបាលពន្លត់អគ្គិភ័យ កុំឲ្យទារលុយពីប្រជាពលរដ្ឋ ជាថ្នូរនឹងការបាញ់ទឹកពន្លត់អគ្គិភ័យ ពោលគឺកុំយករថយន្តពន្លត់អគ្គិភ័យ ធ្វើអាជីវកម្ម។
សម្តេច បានបន្តថា នគរបាលពន្លត់អគ្គិភ័យ ត្រូវប្រកាន់វិជ្ជាជីវៈ និងបំពេញការងារតាមជំនាញដោយមិនរើសមុខ ចៀសវាងការទារលុយ ឬទារនេះទារនោះពីប្រជាពលរដ្ឋមុនសង្គ្រោះ ត្រូវសង្គ្រោះអាយុជីវិតប្រជាពលរដ្ឋជាអាទិភាព មិនត្រូវដាក់លក្ខខណ្ឌជាមួយប្រជាពលរដ្ឋនោះទេ។
បើយោងតាមរបាយការណ៍ គិតត្រឹមឆមាសទី១ ឆ្នាំ២០១៨ នេះ មានរណីគ្រោះអគ្គិភ័យ បានឆាបឆេះចំនួន៣៥១លើក ដោយបានបង្កឲ្យ មានមនុស្សស្លាប់ចំនួន១៦នាក់ និងមានអ្នករងរបួស ចំនួន៤៦នាក់ ព្រមទាំងបណ្ដាលឲ្យឆេះផ្ទះ របស់ប្រជាពលរដ្ឋ អស់ចំនួន៣៦២ខ្នង។
ដោយឡែកកាលពីឆ្នាំ២០១៧ គ្រោះអគ្គិភ័យបានកើតឡើងចំនួន ៥១២ករណី បណ្ដាលឲ្យមនុស្សស្លាប់ ២២នាក់ និងរបួស ១២៨នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។