អាជ្ញាធរ បើកការដ្ឋានជួសជុលប្រាសាទកណ្តាល នៅក្នុងរមណីយដ្ឋានប្រាសាទសំបូរព្រៃគុក
កាលពីរសៀលថ្ងៃទី៥ ខែកក្កដា ឆ្នាំ២០២១ ឯកឧត្តម ផាន់ ណាឌី អគ្គនាយក អាជ្ញាធរជាតិសំបូរព្រៃគុក បានរៀបចំពិធីសែនប្រុងពលិ បើកការដ្ឋាន ជួសជុលប្រាសាទកណ្តាល (C1) នៃក្រុមប្រាសាទតោ។
ការងារនេះគឺជាផ្នែកមួយផ្សេងទៀតនៃការរួមចំណែកក្នុងកិច្ចអភិរក្ស គាំពារបណ្តាប្រាង្គប្រាសាទដែលប្រឈមនឹងហានិភ័យក្នុងរមណីយដ្ឋានប្រាសាទសំបូរព្រៃគុក ដោយនាយកដ្ឋាន រមណីយដ្ឋាន បុរាណវិទ្យា និងអភិរក្ស នៃ អ.ជ.ស.ព. ។
គួរបញ្ជាក់ថា ក្រុមប្រាសាទតោ ស្ថិតនៅចន្លោះក្រុមប្រាសាទសំបូរ និងក្រុមប្រាសាទយាយព័ន្ធ នៃតំបន់ប្រាសាទសំបូរព្រៃគុក។ ក្រុមនៃនៅបន្សល់ប្រាង្គឈរនៅគង់វង្សតែមួយគត់ គឺប្រាង្គកណ្តាលនេះឯង។
ប្រាង្គនេះសាងពីឥដ្ឋ និងមានលម្អដោយថ្មភក់យ៉ាងវិចិត្រ ដែលអ្នកស្រាវពុំទាន់ឯកភាពគ្នា ប៉ុន្តែទោះជាយ៉ាងណាក៏អាចស្នើឡើងថាជាស្ថាបត្យកម្មក្នុងរវាង ចុងសតវត្សរ៍ទី៧ និងចុងសតវត្សរ៍ទី៨ (ក្នុងរចនាបថព្រៃក្មេង និងកំពង់ព្រះ)។
បើនិយាយពីសំណង់ស្ថាបត្យកម្ម ប្រាសាទនេះគឺជារចនាសម្ព័ន្ធធំៗសំខាន់ជាងគេបង្អស់មួយក្នុងសម័យមុនអង្គរ ដែលបានបន្សល់រហូតមកដល់សព្វថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។