ព្រឹត្តិការណ៍ស៊ីហ្គេម២០២៣ នៅកម្ពុជា ក្លាយជាយុទ្ធនាការទាក់ទាញទេសចរអន្តរជាតិ មកអាស៊ានឡើងវិញ
ភ្នំពេញ៖ ប្រទេសសមាជិកអាស៊ានទាំង១០ បានឯកភាពគ្នាយ៉ាងម៉ឺងម៉ាត់ ក្នុងការសហការរៀបចំព្រឹត្តិការណ៍កីឡាស៊ីហ្គេម ឆ្នាំ២០២៣ ឱ្យក្លាយជាយុទ្ធនាការទាក់ទាញភ្ញៀវទេសចរអន្តរជាតិ ឱ្យមកទស្សនានៅក្នុងតំបន់អាស៊ានឡើងវិញ ក្រោយមានការធ្លាក់ចុះដោយសារវិបត្តិជំងឺកូវីដ-១៩ ចូលមករំខានដល់ការធ្វើដំណើររបស់ភ្ញៀវអន្តរជាតិចូលមកក្នុងតំបន់នេះ។ ការឯកភាពគ្នានេះធ្វើឡើង ក្នុងកិច្ចប្រជុំស្ថាប័នទេសចរណ៍ជាតិអាស៊ានលើកទី៥៤ តាមប្រព័ន្ធអនឡាញ កាលពីថ្ងៃទី០៧ ខែកក្កដា ឆ្នាំ២០២១ ដឹកនាំដោយកម្ពុជា។
នាឱកាសនោះដែរ តំណាងប្រទេសសមាជិកអាស៊ានបានដាក់ចេញនូវគំនិតផ្តួចផ្តើម និងផែនការស្តារវិស័យទេសចរណ៍អាស៊ាននៅពេលខាងមុខ ជាពិសេសបានសម្រេចរៀបចំសកម្មភាពផ្សព្វផ្សាយទេសចរណ៍អាស៊ាន ដោយយកព្រឹត្តិការណ៍កីឡាស៊ីហ្គេម ២០២៣ (SEA Game 2023) ជាព្រឹត្តិការណ៍ទាក់ទាញទេសចរអន្តរជាតិមកទស្សនាតំបន់របស់ខ្លួន។
ក្រសួងទេសចរណ៍កម្ពុជាបានបញ្ជាក់ថា ការរៀបចំផែនការផ្សព្វផ្សាយនេះនឹងពិភាក្សាលម្អិតក្នុងកម្រិតគណៈកម្មាការទេសចរណ៍អាស៊ាន។ ស្របនឹងគំនិតផ្តួចផ្តើមនេះ អាស៊ានក៏បានឯកភាពលើការដាក់ឲ្យអនុវត្តនៅពេលខាងមុខនូវផែនការស្តារវិស័យទេសចរណ៍អាស៊ាន អមដោយការរៀបចំគោលការណ៍អាស៊ានរួមស្តីពី អនាម័យ និងសុវត្ថិភាពដែលនឹងដាក់ឲ្យប្រើប្រាស់ក្នុងឆ្នាំ២០២១នេះ។
លើសពីនេះទៀត អាស៊ានក៏បានឯកភាពដាក់ចុះកម្មវិធីស្តារវិស័យទេសចរណ៍ផ្ទៃក្នុង (Intra-ASEAN Travel Program) អាស៊ានដែលនឹងត្រូវអនុវត្តនៅពេលខាងមុខ។ សូមរំលឹកថា ប្រទេសសមាជិកអាស៊ានទាំងអស់ រួមទាំងកម្ពុជាផងដែរ បាននិងកំពុងរៀបចំបើកទទួលឡើងវិញនូវវិស័យទេសចរណ៍អន្តរជាតិរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។